Abategetsi b’u Burundi batangaje ko guhera mu cyumweru gitaha mu bitaro by’uturere twose hatangira igikorwa cyo gupima no kuvura icyorezo cya Coronavirus mu baturage bacyo. Ni mu gihe byakorerwaga gusa mu mujyi wa Bujumbura. Hari mu kiganiro Minisitiri w’ubuzima yagiranye n’abanyamakuru kuri uyu wa 19 Kamena 2020. U Burundi bwagiye bunengwa kenshi guhisha uko icyorezo cya Coronavirus gihagaze.

Ndikumana Thaddee, Minisiriri w’Ubuzima mu Burundi yabwiye abanyamakuru ko igikorwa cyo gupima no kuvura abanduye Virus ya Corona mu gihe ibi byari bisanzwe bikorerwa mu mujyi wa Bujumbura. Asaba kandi ko abantu bakwirinda gukoresha imiti gakondo kuri iyi ndwara ngo kuko bishobora kwishyira mu byago.

Yagize ati“ Dushaka yuko mu minsi iri imbere, mu cyumweru gitaha dutangira kwegereza abenegihugu uburyo bwo gushobora kubapima no kubavura, dushaka kubishyira mu mavuriro y’akarere k’ubuvuzima, ni ukuvuga mu mavuriro ari hagati mu gihugu”. Akomeza avuga ko ikibazo cy’ibikoresho bizifashishwa cyakemutse.

Mu gihe mu mujyi wa Bujumbura hari abantu bigize abaganga b’iyi ndwara aho bakoresha imiti gakondo mu kuvura abantu ndetse abandi bakivura iwabo, Minisitiri w’Ubuzima Ndikumana yasabye buri wese ko yareka ibyo kwivura magendu ahubwo akegera abaganga babigenwe.

Abantu 104 nkuko ijwi rya Amerika dukesha iyi nkuru ryabitangaje, nibo bamaze gutangazwa na Leta y’u Burundi ko banduye Coronavirus, 75 barayikize naho 28 barimo kuyivurwa mu gihe umwe bivugwa ko ariwe wahitanywe n’iki cyorezo nkuko Minisitiri w’Ubuzima yabitangarije itangazamakuru.

Munyaneza Theogene / intyoza.com