Umupfakazi wa Meya wishwe na Covid-19, niwe ugiye kurangiza Manda ye

Umugore w’imyaka 40 wapfushije umugabo wari umuyobozi w’akarere ko muri Mexico (Mexique) azize Covid-19, ni we ubu ugiye kurangiza igihe umugabo we yari asigaje kuri manda ye.

Inteko ishingamategeko ya leta ya Sinaloa – imwe muri leta zigize Mexico – yemeje igenwa rya Pier Angely Camacho ku majwi 35 n’umudepite umwe wifashe.

Umugabo we Carlo Mario Ortiz wari ufite imyaka 46, yari yarakorewe ubuvuzi bwo guterwamo impyiko akiri umwana, bivuze ko yari mu cyiciro cy’abibasirwa cyane na Covid-19. Yapfuye mu cyumweru gishize.

Mu 2018 ni bwo Bwana Ortiz yongeye gutorerwa kuba ‘Mayor’ w’akarere ka Salvador Alvarado, gatuwe n’abaturage bagera ku 80,000.

Madamu Camacho nkuko BBC ibitangaza, yahoze akora mu kigo cyo muri iyo leta cyita ku mibereho myiza y’abaturage. Azaba kuri uyu mwanya w’ubuyobozi bw’akarere kugeza habaye andi matora y’umuyobozi w’akarere ku itariki ya 31 z’ukwezi kwa 10 mu 2021.

Yavuze ko atewe ishema no gukomereza aho umugabo we yari agejeje.
Kugeza ubu muri Mexico hamaze gutangazwa abantu barenga 800,000 banduye coronavirus, muri bo abarenga 80,000 yarabishe nkuko imibare ya Kaminuza ya Johns Hopkins yo muri Amerika ibigaragaza.

Munyaneza Theogene / intyoza.com

Umwanditsi

Learn More →