Igipolisi muri Canada cyataye muri yombi umunyeshuri ukekwaho kwica abantu batandatu ndetse agakomeretsa abandi umunani mu gitero bikekwako ari icy’iterabwoba.

Polisi yo mu mujyi wa Quebec mu gihugu cya Canada, yataye muri yombi umunyeshuri wiga muri kaminuza aho imushinja kuba inyuma y’igitero cyahitanye ubuzima bw’abantu batandatu mugihe abandi umunani bakomeretse ku musigiti w’abayisilamu ku cyumweru taliki ya 29 Mutarama 2017.

Nkuko bitangazwa n’igipolisi, Alexandre Bissonnette, w’imyaka 27 niwe ukekwaho ubu bwicanyi. Minisitiri w’intebe wa Canada Trudeau yatangaje ko iki gitero ari icy’iterabwoba kubayisilamu.

Mu gihe iki gitero cy’ubwicanyi kibonwa nk’ikiterabwoba cyabaga ku cyumweru tariki ya 29 Mutarama 2017, Abantu basaga 50 nibo bitangazwa ko bari mu musigiti w’abayisilamu i Quebec.

Umuvugizi w’igipolisi mu mujyi wa Quebec, Christine Coulombe, nkuko amakuru dukesha ijwi rya amerika abivuga, yatangaje ko abapfuye bafite imyaka iri hagati ya 35 na 70. Atangaza kandi ko mu bantu umunani bakomeretse, batanu muribo barembye cyane.

 Kanda hano ujye ubona amakuru y’iwacu kandi isaha ku isaha kuri Facebook no kuri twitter

Munyaneza Theogene / intyoza.com