Mu gihe irahira ry’umukuru w’Igihugu cya Kongo Kinshasa watowe ryari riteganijwe kuba tariki 18 Mutarama 2019, Komisiyo y’amatora yigenga-CENI muri iki gihugu yatangaje ko irahira ry’umukuru w’Igihugu ari tariki 22 Mutarama 2019.

Umuhango wo kurahira k’umukuru w’Igihugu watowe muri Kongo Kinshasa n’ubwo atari yemezwa burundu, uteganijwe tariki 22 Mutarama 2019 aho ku ngengabihe isanzwe wari kuba kuwa 18 Mutarama 2019.

Imwe mu mpamvu Komisiyo y’Igihugu y’amatora yigenga-CENI muri Kongo Kinshasa yatangaje nk’imbogamizi yatumye uyu muhango w’irahira wimurwa nk’uko Radio Okapi dukesha iyi nkuru ibitangaza, ngo ni uko ibyavuye mu matora bigomba kubanza gutangazwa mu buryo bwa burundu n’urukiko rushinzwe kurinda iremezo ry’itegeko nshinga rw’iki gihugu( Cour Constitutionnelle).

Uretse amatora y’umukuru w’Igihugu yabaye agatsindwa ku buryo bw’agateganyo na Felix Tshisekedi wagize amajwi 38,57%, muri iki gihugu mu bice bitandukanye hanabaye amatora y’intumwa za rubanda aho abatowe n’abaturage batangajwe tariki 12 Mutarama 2019.

Itariki y’irahira ry’umukuru w’Igihugu cya Kongo Kinshasa ishobora kongera guhinduka igashyirwa tariki 23 Mutarama 2019 mu gihe ku byatangajwe mu majwi y’intumwa za rubanda haba hagize ujuririra nk’uko CENI ibitangaza.

Amatora y’umukuru w’Igihugu cya Kongo Kinshasa yabaye tariki 30 Ukuboza 2018, mu majwi y’agateganyo y’ibyavuye mu matora yatangejwe tariki 10 Mutarama 2019, Felix Antoine Tshisekedi Tshilombo niwe wagize amajwi amushyira ku mwanya w’Umukuru w’Igihugu by’agateganyo n’amajwi 38,57%.

Munyaneza Theogene / intyoza.com