Umukino w’umupira w’amaguru wo mu kiciro cya mbere mu gihugu cy’ubwongereza wahuje ikipe ya Arsenal na mukeba wayo Manchester United kuri iki cyumweru tariki 10 Werurwe 2019 warangiye ikipe ya Arsenal ihigitse Man United ku bitego 2-0 bituma ifata umwanya wa kane muri iyi Shampiyona.

Uyu mukino watangiye ku i saa kumi n’ebyiri n’iminota 30 wari ishiraniro kuri aya makipe asanzwe atoroherana, cyane ko mu mikino yo mu bihe bishize wasangaga ikipe ya Arsenal isa nk’iyahoraga ari insina ngufi imbere ya Man United. Kuri iyi nshuro siko byagenze kuko arsenal yashakaga gutsinda yabigezeho ku bitego 2-0.

Abakinnyi nka Granit Xhaka ndetse na Pierre- Emerick Aubameyang nibo batsinze ibitego byahesheje ikipe ya Arsenal intsinzi yanasize iyiteretse ku mwanya wa kane n’amanota 60 ivuye ku mwanya wa 5 yari imazeho iminsi.

Igitego cya mbere cya Arsenal cyabonetse ku munota wa 12 w’igice cya mbere gitsinzwe na Granit Xhaka, mu gihe igitego cya kabiri cyatsinzwe na Pierre-Emerick Aubameyang ku munota wa 69 kuri Penaliti.

Dore uko mu kibuga amakipe yombi yari ahagaze nk’uko tubikesha The Guardian

Munyaneza Theogene / intyoza.com