Ku nshuro ya mbere muri Leta zunze ubumwe za Amerika, kuri uyu wa 16 Werurwe 2020 abantu bane bakoreweho igerageza ry’urukingo rw’indwara ya Corona Virus-Covid-19.
Abarwayi ba Corona Virus bane nibo batewe inshinge z’uru rukingo ku kigo cy’ubushakashatsi cya Kaiser Permanente kiri I Seattle ho muri Leta ya Washington nk’uko BBC dukesha iyi nkuru ibivuga.
Urukingo rurimo kugeragezwa ntabwo rushobora gutera Covid-19 ariko rufite igice kirugize cyavanywe muri iyi Virus itera iyi ndwara ya Corona Virus. Abahanga bavuga ko bizafata amezi menshi kumenya niba uru rukingo, cyangwa izindi ziri mu bushakashatsi ruzakora.
Kuri uyu wa mbere tariki 16 Werurwe 2020, umuntu wa mbere watewe uru rukingo ni umugore wo muri Seattle w’imyaka 43 ufite abana babiri. Uyu mugore witwa Jennifer Haller yatangaje ko aya ari amahirwe akomeye kuri we yo kugira icyo akora.
BBC ikomeza itangaza ko, abashakashatsi ku isi bari gukora iyo bwabaga ngo bashake vuba na bwangu urukingo rw’iki cyorezo. Iri gerageza rya mbere rikorewe ku bantu, ni indi ntambwe kuko amagerageza menshi yakorerwaga ku nyamaswa. Abahanga bavuga kandi ko nubwo iri gerageza rya mbere ryatanga umusaruro, bishobora gufata amezi 18 kugira ngo uru rukingo rukwizwe mu bantu.
Munyaneza Theogene / intyoza.com
