Mu Mudugudu wa Gitwa, Akagali ka Kimirima, Umurenge wa Busoro ho mu karere ka Nyanza haravugwa abantu batawe muri yombi kuri uyu wa 25 Mata 2020 bazira gusengera mu rugo rw’umuntu. 

Ubuyobozi bw’Akarere ka Nyanza buvuga ko bwahawe amakuru n’inzego z’ibanze ko hari abantu barenze ku mabwiriza ya Leta asaba buri wese ku guma mu rugo mu rwego rwo kwirinda ikwirakwizwa ry’icyorezo cya Covid-19.

Abafashwe, basanzwe mu rugo rw’uwitwa Yabarengeye Chantal, aho ngo yari yarakoze urusengero iwe mu rugo kandi binyuranije n’amabwiriza ya Minisitiri w’Intebe yo kurwanya Covid-19 nk’uko umuyobozi w’akarere ka Nyanza Bwana Ntazinda Elasme yabitangarije intyoza.com

Yagize ati” Nibyo hari abantu bari barahinduye inzu urusengero kandi bitemewe, turahagera abo bantu turabafata ubu turabafite kuri Police”.

Meya Ntazinda, akomeza yibutsa abaturage ko bibujijwe muri ibi bihe guteranira mu rugo abantu basenga, ko nta masengesho rusange yemewe, ko gahunda ari Guma mu rugo.

Ati” Ndibutsa abaturage b’Akarere ka Nyanza ko bibujijwe guteranira hamwe ngo bari mu masengesho, abantu ni ukuguma mu rugo kugirango twirinde gukwirakwiza Covid-19 ariyo turi kurwana nayo mu Rwanda no ku Isi yose”.

Amakuru agera ku intyoza.com avuga ko aba bantu basengeraga hamwe ari abiyomoye kw’itorero ry’Abadiventiste b’Umunsi wa Karindwi, bose hamwe bakaba bari barindwi kandi ngo bakaba bafite imyumvire ubuyobozi buvuga ko bica amabwiriza nkana.

intyoza.com