Umukuru w’Igihugu cya Madagascar, Andry Rajoelina avuga ko umuti Covid-organics wavumbuwe n’iki gihugu ukozwe mu bimera gakondo kandi ukaba uvura Coronavirus, ko kuba ugishidikanywaho ari uko ahari wakorewe muri Afurika, ko iyo uvumburwa n’Abanyaburayi uba utagibwaho impaka.

Perezida Rajoelina yabwiye France24 ati: “Iyo itaba ari Madagascar, ikaba ari igihugu cy’Iburayi cyavumbuye uyu muti, hari kuba kuwushidikanyaho cyane gutya? Siko mbitekereza”.

Ishami rya ONU/UN rishinzwe ubuzima ku isi, WHO, ryaburiye kenshi ko umuti wa Covid-Oranics – Leta ya Madagascar ivuga ko uvura Covid-19 – utigeze upimwa ku rwego mu buhanga bwo kuvura.

Uyu muti ukorwa mu giti kitwa Artemisia – gisanzwe kifashishwa mu kuvura malaria – kivangwa n’ibindi byatsi byo muri iki gihugu.

Perezida Rajoelina yagize ati: “Abahanga muri siyansi ba Africa ntibakwiye gusuzugurwa. Ndatekereza ko ikibazo ari uko [uwo muti] uva muri Africa bityo ntibakwemera…ko igihugu nka Madagascar kizana umuti wo gukiza isi“. Akomeza avuga ko uyu muti ukiza umuntu wanduye Covid-19 mu minsi 10.

Ibihugu bya Equatorial Guinea, Guinea-Bissau, Niger na Tanzania byamaze gusaba no kohererezwa kuri uwo muti, Leta ya Madagascar yatangaje mu kwezi gushize kwa Mata.

Asubiza ku bivugwa na OMS, Perezida Rajoelina yagize ati: “Nta gihugu cyangwa umuryango bizaduhagarika”. Avuga ko ibyemeza ko umuti wabo uvura ari “abarwayi bacu uri gukiza”.

Nkuko BBC dukesha iyi nkuru ibivuga, mu gihugu cya Madagascar hamaze gutangazwa abantu 186 banduye coronavirus na 105 bamaze kuyikira, nta muntu irica.

Perezida Rajoelina yavuze ko “abakize iyi ndwara bakijijwe gusa no guhabwa uyu muti wa Covid-Organics”.

Mu cyumweru gishize, OMS yavuze ko Abanyafurika bakwiye kubona imiti yabanje guca mu mageragezwa nyayo, kabone niyo yaba ari imiti gakondo.

Perezida Rajoelina we, avuga ko uyu muti ari “umuti gakondo ukozwe mu buryo bugezweho” yongeraho ko Madagascar itari gukora igerageza ry’ubuhanga ahubwo iri “gukurikirana uko uwo muti uvura” bigendanye n’amabwiriza ya OMS/WHO.

intyoza.com