Umukandida w’ishyaka CNL ritavuga rumwe na Leta mu Burundi, Agathon Rwasa, nyuma yo kudatsinda amatora y’Umukuru w’Igihugu, aho yaje ku mwanya wa kabiri n’amajwi 24,19%, yanze ibyatangajwe na Komisiyo ishinzwe matora-CENI. Yiyambaje urukiko rurinda iremezo ry’itegeko Nshinga( Sentare yubahiriza ibwirizwa Nshingiro).

Agathon Rwasa, nyuma yo kutanyurwa n’ibyo Komisiyo y’Igihugu ishinzwe amatora mu Burundi-CENI yatangaje, aho yavuze ko uwatsinze amajwi by’agateganyo ari Ndayishimiye Evariste wagize 68,72%,  yagiye kuregera urukiko rurinda iremezo ry’itegeko Nshinga. Ahamya ko ahereye ku byemezo yahaye iyo uru rukiko, ari we yatahukanye intsinzi mu matora y’umukuru w’Igihugu.

Mu ibarura ry’amajwi  y’agateganyo, Komisiyo ishinzwe gutunganya amatora-CENI, yemeje ko umukandida w’Ishyaka CNDD FDD riri ku butegetsi General Ndayishimiye Evariste ariwe yatsindiye intebe ya perezida ku majwi 68.72% naho uwamukurikiye akaba Agathon Rwasa w’Ishyaka CNL ritavuga rumwe n’ubutegetsi aho yabonye anajwi 24.19% ku bakandida barindwi bari bahanganiye iyi ntebe.

Agathon Rwasa, nkuko ijwi rya Amerika dukesha iyi nkuru ribitangaza, akiva gutanga ikirego yavuze ko ibizaba muri uru rukiko rurinda iremero ry’itegeko nshinga nibitamunyura, aziyambaza izindi nzego zo mu karere. Urukiko rugomba kuba rwamusubije mu gihe kitarenze iminsi umunani.

Munyaneza Theogene / intyoza.com