Kugeza muri iki gihe, igihugu cya Brazil giherereye muri Amerika y’epfo kiri ku mwanya wa kane mu bimaze kugira umubare munini w’abantu bahitanwe n’icyorezo cya Covid-19, aho abamaze gupfa basaga ibihumbi 28 mu bantu hafi ibihumbi magana atanu babarurwa ko barwaye iki cyorezo.

Mu barwaye iki cyorezo cya Covid-19, abantu 28.834 muri iki gihugu bamaze gupfa bazize iki cyorezo. Leta Zunze Ubumwe za Amerika, Ubwongereza n’Ubutaliyani nibyo bihugu biza ku myanya itatu ya mbere uko bikurikirana mu gupfusha abantu benshi kurusha ibindi bihugu.

Perezida wa Brazil, Jair Boslonaro yakomeje gukerensa iki cyorezo cya Coronavirus, nubwo iki gihugu kiza ku mwanya wa kabiri ku Isi mu bihugu bifite abantu benshi banduye Coronavirus. Brazil ifite muri iki gihe abantu 498.440 barwaye Covid-19.

Leta zunze Ubumwe z’Amerika niyo yonyine iza imbere ya Brazil ku bijyanye n’imibare y’abantu benshi banduye iki cyorezo. Ifite abantu barenga Miliyoni banduye Coronavirus.

Abahanga, nkuko ijwi rya Amerika ribivuga, batangaje ko imibare nyakuri ishobora kuba iri hejuru cyane kubera abantu benshi batapimwe.

Perezida wa Brazil, Jair Bolsonaro ntasa n’ushaka guhindura cyangwa se kuva aho ahagaze. Avuga ko ingaruka ku butunzi zo kubuza abantu kuva mu ngo zabo” Guma mu rugo” ziruta ingaruka z’iki cyorezo.

Abahanga batari bake, bavuga ko ibihugu byo muri Amerika yo hagati na Amerika y’epfo aribyo bizahajwe cyane kurusha ibindi n’iki cyorezo cya Coronavirus.

Munyaneza Theogene /intyoza.com