Tolulope Arotile, Umupilote w’umugore wari uwa mbere ubayeho muri Nigeria utwara kajugujugu z’intambara yapfuye kuri uyu wa Kabiri tariki 14 Nyakanga 2020 azize ibikomere byatewe n’impanuka yo mu muhanda, nkuko ingabo zirwanira mu kirere z’iki gihugu zabitangaje kuri uyu wa Gatatu tariki 15 Nyakanga 2020.

Iyo mpanuka yo mu muhanda yahitanye uyu mu Pilote ngo yabereye ku kigo cy’igisirikare cya Nigeria kirwanira mu kirere kiri muri leta ya Kaduna mu majyaruguru ashyira uburengerazuba bw’igihugu. Ariko itariki iyo mpanuka yabereyeho ntiyatangajwe.

Mu kwezi kwa cyenda mu mwaka wa 2017 nibwo Arotile yinjiye mu ngabo za Nigeria zirwanira mu kirere. Itangazo ryo kuri Twitter ry’igisirikare cya Nigeria kirwanira mu kirere rigira riti: “Mu gihe gito ariko cyabaye ingirakamaro yamaze mu gisirikare, nyakwigendera Arotile yagize uruhare rukomeye mu guca amabandi yitwaje intwaro muri leta zo mu gice cyo hagati mu majyaruguru”.

Muri iri tangazo nkuko BBC ibitangaza, rikomeza rivuga ko uyu mupilote yagize n’uruhare rukomeye mu guca “n’abandi bagizi ba nabi atwara indege mu mirwano yahawe izina rya ‘Operation GAMA AIKI’ i Minna, muri leta ya Niger [imwe mu zigize Nigeria]”.

Munyaneza Theogene / intyoza.com