Agatsiko k’abasirikare kahiritse perezida wa Mali mu kwezi gushize kwa munani kahawe kugeza ku itariki ya 15 y’uku kwezi kwa cyenda 2020 ngo kabe kamaze gushyiraho umutegetsi w’umusivile wo kuyobora inzibacyuho (cyangwa imfatakibanza mu Kirundi).

Umuryango w’ubukungu w’ibihugu byo muri Afurika y’uburengerazuba (CEDEAO/ECOWAS) wavuze ko uwo Perezida w’umusivile na minisitiri w’intebe w’umusivile bayobora igihugu kugeza habaye amatora.

Ntacyo agatsiko k’abasirikare kafashe ubutegetsi muri Mali kari kasubiza ku mugaragaro kuri ibyo byatangajwe ejo ku wa mbere tariki 07 Nzeri 2020 mu nama yitabiriwe n’abakuru b’ibihugu umunani bo mu muryango wa CEDEAO – ugizwe n’ibihugu 15 – yabereye i Niamey mu murwa mukuru wa Niger.

CEDEAO ishaka ko inzibacyuho imara umwaka umwe, ariko mu gihe gishize ako gatsiko k’abasirikare kavuze ko gashaka “igihe kirimo gushyira mu gaciro”, kavuga ko nibura kahabwa imyaka ibiri. Kamaze iminsi kari mu biganiro hamwe n’abanyapolitike byiga ku nzibacyuho.

Mu mpera y’icyumweru gishize, Perezida wahiritswe ku butegetsi, Ibrahim Boubacar Keïta yemerewe gusohoka mu gihugu yerekeza muri Emira Zunze Ubumwe z’Abarabu kwivuza indwara y’imitsi yo mu bwonko.

Mu gihe cy’iminsi 10, yafunzwe n’ako gatsiko k’abasirikare kamuhiritse ku butegetsi, aza kurekurwa ku gitutu cy’amahanga ahamishwa iwe mu rugo.

Mu ijoro ryo ku itariki ya 18 y’ukwezi kwa munani 2020, ubwo yari yafashwe n’abasirikare, yatangarije kuri televiziyo y’igihugu ko yeguye.

Mbere yuko ahirikwa, BBC dukesha iyi nkuru itangaza ko abatavuga rumwe n’ubutegetsi bari bamaze amezi basaba ko yegura, bamushinja kuba intandaro yo kuzamba k’ubukungu, ruswa no kunanirwa guhashya intagondwa zigendera ku mahame akaze ya kisilamu.

Munyaneza Theogene / intyoza.com