Igihugu cya Brazil kirateganya gukoresha urukingo rwakorewe mu Bushinwa mu mugambi w’igihugu wo gukingira coronavirus, nk’uko abategetsi baho babivuga.
João Doria, guverineri wa leta ya São Paulo, yavuze ko guverinoma yabo yemeje kugura doze miliyoni 46 z’urukingo rwa CoronaVac.

Yavuze ko gahunda yo gukingira ishobora gutangirana n’ukwezi kwa mbere mu 2021. Yahita iba umuhate wa mbere ku isi muri ubu buryo wo kurwanya iki cyorezo. Brazil ni kimwe mu bihugu ku isi byazahajwe cyane na coronavirus. Abantu miliyoni 5.3 barayanduye
Ni igihugu cya gatatu gifite benshi nyuma ya USA n’Ubuhinde – kandi ni icya kabiri inyuma ya USA mu gupfusha benshi, hafi 155,000 bamenyekanye kugeza ubu, nk’uko bivugwa na Kaminuza y’ubushakashatsi ya Johns Hopkins.

Uru rukingo, Nirwemezwa n’abashinzwe ubuzima muri iki gihugu, ruzaba ari rumwe mu nkingo ebyiri zishyizwe muri gahunda yo gukingira muri Brazil. Brazil inateganya gutera abantu urukingo ruri gutunganywa na Kaminuza ya Oxford yo mu Bwongereza ifatanyije na kompanyi ikora imiti AstraZeneca.

Bwana Doria mbere yari yarashimagije igeragezwa ry’urukingo rw’Ubushinwa, avuga ko ateganya ko ruterwa bamwe mu baturage ba São Paulo.

Uru rukingo ruri gusuzumwa n’ikigo cy’ubushakashatsi cya leta ya São Paulo
Ku wa mbere, icyo kigo cyavuze ko ruterwa umuntu ari doze ebyiri, babonye rukora neza mu igeragezwa ku bantu benshi.
Gusa, iki kigo cyaburiye ko ibyo babonye ari iby’ibanze, ko bakomeje gusuzuma. Ko amakuru arambuye ku buziranenge bwarwo bazayatangaza isuzuma rirangiye.
Igerageza ry’uru rukingo mbere y’uko ruterwa abantu riri gukorwa kandi muri Turkiya na Indonesia.
Source:Reuters

Venuste Habineza/Intyoza.com