Mu ijoro ryo kuri uyu wa mbere tariki 06 Mutarama 2025 mu ma saha y’i saa tatu, Ikamyo yo mu bwoko bwa HOWO ifite Pulaki RAH 502D yari itwawe na Ishimwe Regis w’imyaka 25 y’amavuko, yagonze Umukecuru Mukahakiza Clemence w’imyaka 60 y’amavuko ahita apfa.

Iyi kamyo ya HOWO yakoze impanuka yari ivuye gupakira Umucanga ahazwi nka Vunga. Yagonze uyu mukecuru ubwo yari igeze mu isantere y’Ubucuruzi ya Karubanda, Umudugudu wa Karubanda, Akagari ka Bibungo, Umurenge wa Nyamiyaga ho mu Karere ka Kamonyi.

Uyu mukecuru Mukahakiza Clementine, amakuru intyoza.com yahawe ni uko yagendaga n’amaguru ashaka kwambukiranya umuhanda avuye mu gisate cy’umuhanda iyi modoka ya HOWO yagombye kuba igenderamo. Uyu mukecuru yari atuye inyuma y’iyi santere y’aho yagongewe.

Amakuru bamwe mu baturage bahaye intyoza.com ni uko iyi mpanuka ishobora kuba yatewe no kuba iyi kamyo ya HOWO yari ifite umuvuduko kandi ari mu ijoro hatabona neza ndetse n’umuhanda ubwawo utameze neza.
Nyakwigendera yajyanywe ku bitaro bya Remera Rukoma, mu gihe Umushoferi ndetse n’imodoka yari atwaye bajyanywe kuri Sitasiyo ya Polisi ya Mugina mu gihe hahise hatangizwa iperereza ryimbitse.
intyoza.com