Mu ngamba nshya zo guhangana no gukumira ikwirakwizwa ry’icyorezo cya CoronaVirus, ubutegetsi bwa Uganda bwafashe icyemezo kibuza abashoferi b’amakamyo binjira muri iki gihugu kugira Hoteli cyangwa se ahandi hantu aho ariho hose bacumbika. Banabujijwe kandi kugira umuntu wundi batwara hagamijwe kwirinda Covid-19.

Umukuru w’Igihugu cya Uganda, Yoweri Kaguta Museveni ibi yabitangaje nyuma y’aho hari abashoferi 20 b’amakamyo binjiye muri iki Gihugu bavuye mu Gihugu cya Kenya, babapima bakabasangana iki cyorezo cya CoronaVirus.

Mu ntangiriro z’iki cyumweru nkuko BBC dukesha iyi nkuru ibitangaza, Uganda yatangiye gupima abashoferi bose b’amakamyo yinjira muri iki gihugu, ibi byateje umubyigano udasanzwe w’izi modoka ku mupaka uhuza Kenya na Uganda.

Inzira iva ku cyambu cya Mombasa muri Kenya ni ingenzi cyane mu bwikorezi bw’ibicuruzwa n’ibindi nkenerwa byinshi muri Uganda, Rwanda, Sudani y’Epfo n’uburasirazuba bwa DR Congo.

Perezida Museveni yavuze ko guhagarika ubwikorezi bw’imizigo byaba ari ukwigerezaho. Yanenze abaturage ba Uganda bashatse gusagarira abatwara amakamyo ngo nibo babazanira coronavirus.

Gusa yavuze ko koko bateye impungenge, ndetse abagereranya n’igihe cy’indwara ya SIDA mu myaka ya 1990 ubwo abashoferi b’amakamyo mu karere byavugwaga ko aribo bayikwirakwiza mu mijyi n’aho bagendaga bahagarara.

Abaminisitiri bashinzwe ubuzima mu bihugu bigize umuryango wa Afurika y’iburasirazuba, mu kwezi gushize bakoze inama bemeza ko nubwo ibihugu byafunze imipaka imodoka nini zitwara imizigo zigomba gukomeza kugenda hagati y’ibi bihugu.

Imibare itangwa na minisiteri zishinzwe ubuzima muri ibyo bihugu igaragaraza ko abamaze kwandura coronavirus kugeza ubu ari:

• Tanzania: 480
• Kenya: 384
• Rwanda: 212
• Ugand: 79
• Sudani y’Epfo: 34
• Burundi: 14

intyoza.com