Umuryango w’Ubumwe bwa furika, watangaje ko urimo kuvugana na Leta ya Madagascar hagamijwe kubona amakuru ya gihanga ngo upime umuti wavumbuwe n’iki gihugu harebwe niba koko uyu muti nta kibazo utwaye kandi niba koko uvura Coronavirus.

Uyu muryango uvuga ko nubona amakuru arambuye, ibigo byawo byo gukumira no kurwanya ibyorezo (Africa CDC) bizayasuzuma bikareba niba uyu muti wiswe Covid Organics uvura.

Mu itangazo wasohoye, uyu muryango w’ubumwe bwa Afurika uvuga ko iri suzuma rizashingira ku mahame mpuzamahanga n’ibimenyetso bya gihanga ku mikorere y’uyu muti.

BBC dukesha iyi nkuru, itangaza ko Ishami ry’umuryango w’abibumbye rishinzwe ubuzima ku isi, OMS/WHO, rivuga ko nta muti riremeza ko uvura Covid-19.

Ubuvuzi bwifashishije ibimera bufite umwanya munini ku ndwara muri Afurika, ibi na OMS irabyemera ariko ikaburira abantu kuri uwo muti, mu gihe isi yose ikeneye umuti wa coronavirus.

OMS ivuga ko bikwiye ko uyu muti ubanza gusuzumwa no kugeragezwa mu buryo bwa gihanga, ikabwira abantu ko biteye impungenge kwizera imiti idapimye.

Leta ya Madagascar yo ivuga ko uyu muti wapimwe kandi ukageragezwa n’abahanga b’iki gihugu mbere yo kwemezwa.

Perezida Andry Rajoelina wa Madagascar, aherutse gutangaza ko mu cyumweru gitaha bazatangira no kugerageza urukingo narwo rushingiye ku kimera uyu muti ukozemo.

Abategetsi b’ibihugu bya Guinea Bissau, Equatorial Guinea, Congo na Tanzania bamaze kuvuga ko bakeneye ko Madagascar ibaha kuri uwo muti ukoze mu kimera cya artemisia.

Umugabane wa Afurika umaze kubonekaho abantu barenga 45,000 banduye Covid-19 n’abandi hafi 2,000 imaze kwica.

intyoza.com