Kuri uyu wa 31 Kanama 2020, hagati y’Igihugu cy’Ubushinwa ndetse n’Ubuhinde hongeye kuzamuka icyuka kitari cyiza cyakuruwe no kuba buri gihugu gishinja ikindi kurengera imbago z’urubibe rwo mu misozi ya Himalaya.
Uku gushinjanya hagati y’ibi bihugu bibarwa mu byambere ku Isi mu kugira abaturage benshi, kubaye hashize amezi abiri habaye ugushyamirana kwahitanye abasirikare bagera kuri 20 b’abahinde.
Ubuhindi bushinja Ubushinwa gushaka kurengera urubibe rwabwo mu ntara ya Ladakh kuwa Gatandatu w’icyumweru gishize, mu gihe Ubushinwa nabwo buvuga ko abasirikare b’Ubuhindi babigerageje kuri uyu wa mbere.
Ibi bihugu uko ari bibiri bivuga ko bizarwanira ubutaka bwabyo. Urwango hagati y’ibi bihugu bitunze ibitwaro bya kirimbuzi-Nikleyeli, ubu rugeze ku rugero runini kuva birwanye biturutse ku makimbirane y’urubibe mu mwaka wa 1962.
Ibiganiro bya kidipolomasi na gisirikare hagati y’ibi bihugu nkuko ijwi rya Amerika ribitangaza, nta ntambwe byagezeho. Minisitiri w’ingabo yavuze kuri uyu wa mbere ko abasirikare b’Ubushinwa bakoze ibikorwa by’ubushotoranyi kuwa Gatandatu. Mugenzi we w’Ubushinwa nawe yavuze ko Ubuhinde bwaciye ukubiri n’ubwigenge bw’Ubushinwa mu bikorwa bwakoze kuwa mbere kandi busaba Ubuhinde gusubiza inyuma abasirikare babwo.
Munyaneza Theogene / intyoza.com
