Muri Uganda, abakozi bo mu rwego rw’ubuzima bahitwanwa n’icyorezo cya Corona bariyongereye mu kwezi gushize. Abadogiteri 16 barishwe n’icyo cyorezo, mu gihe abandi bakiri mu bitaro aho barembeye.

Ishyirahamwe ry’abaganga muri Uganda nkuko VOA dukesha iyi nkuru ibitangaza, ryemeza ko abakora mu rwego rw’Ubuzima barenga 100 bapfuye nyuma yo kwandura icyo cyorezo kuva mu kwezi kwa gatatu k’umwaka ushize.

Dr. Mukuzi Muhereza, umunyamabanga mukuru w’iryo shyirahamwe, avuga ko iyo mibare yiyongereye cyane mu kwezi gushize.

Gushyika kw’itariki ya 5 y’ukwezi kwa Karindwi, Uganda imaze kugira abantu 425 bashyashya banduye, ibyatumye imibare y’abanduye bose igera ku bantu 84 979 hamwe n’abarenga 2 000 icyo cyorezo kimaze guhitana.

Minisiteri y’Ubuzima muri iki gihugu, itangaza ko muri rusange, abadogiteri 37 bamaze gupfa bishwe na COVID-19 kuva igaragaye. Ivuga ko bamwe bari basanzwe barwaye za diyabete n’umuvuduko w’amaraso, abandi bishwe nuko batikingije cyangwa se bari bageze mu zabukuru.

Munyaneza Theogene / intyoza.com