Congo: umuntu umwe yiciwe mu myigaragambyo y’abatavuga rumwe na Leta

Mu myigaragambyo y’abatavuga rumwe na Leta ya Congo, inzego z’umutekano zarashe mubigaragambya umwe arapfa.

Kuri uyu wa Kane Taliki ya 26 Gicurasi 2016, hirya no hino muri Repubulika iharanira Demokarasi ya Congo, umuntu umwe yapfiriye mu myigaragambyo y’abatavuga rumwe na Leta.

Imyigaragambyo yabaye, ntabwo yasize umurwa mukuru w’Igihugu Kinshasa, abatavuga rumwe na Leta bagiye mu mihanda nyuma y’uko urukiko muri Congo rwemeje ko mugihe amatora y’umukuru w’Igihugu atabaye mu kwezi kwa 11 uyu mwaka nkuko byari biteganyijwe ngo Perezida Joseph Kabila azakomeza gutegeka Congo kugeza igihe amatora azabera.

Mu murwa mukuru w’Igihugu Kinshasa, abigaragambyaga bahanganye n’inzego zishinzwe umutekano kugeza zikoresheje ibyuka biryani mu maso kugira ngo zibashe kubatatanya.

Mu mujyi wa Goma uri mu burasirazuba bw’iki Gihugu, abigaragambya bakozanyijeho n’inzego za Polisi, umupolisi w’umugore ngo yakubiswe bikabije n’abigaragambya nyuma umupolisi arasa mu bigaragambya umuntu umwe ahasiga ubuzima.

Abigaragambya, bashinja Ubutegetsi bwa Perezida Joseph Kabila gukoresha amayeri yo gushaka ko Perezida Joseph Kabila aguma k’ubutegetsi kugeza igihe kitazwi.

 

 

Intyoza.com

Umwanditsi

Learn More →