Covid-19: Ikigo FDA cyo muri Amerika cyemeje ikoreshwa ry’urukingo rutangwa inshuro imwe

Ikigo cy’Amerika cy’ubugenzuzi bw’ibiribwa n’imiti (FDA) cyemeje ku mugaragaro ikoreshwa ry’urukingo Johnson & Johnson rwa coronavirus rutangwa inshuro imwe. Rubaye urwa gatatu rwemerewe gukoreshwa muri Amerika.

Uru rukingo rwitezweho kuba amahitamo ahendutse ugereranyije n’inkingo za Pfizer na Moderna, kandi rushobora kubikwa mu cyuma gikonjesha gisanzwe (frigo), aho kuba icyuma gikonjesha mu buryo bw’umurengera.

Amageragezwa yarwo yagaragaje ko rurinda uburwayi bw’igikatu, ariko ko muri rusange iyo hagiyemo n’uburwayi bworoheje rurinda ku kigero cya 66%. Ni rukingo rukorwa na kompanyi Janssen yo mu Bubiligi.

Iyi kompanyi yemereye Amerika ko kugeza mu mpera y’ukwezi kwa gatandatu izaba yayihaye doze miliyoni 100 z’uru rukingo. Doze za mbere zishobora kugera ku baturage b’Amerika bitarenze mu cyumweru gitaha.

Ubwongereza, umuryango w’Ubumwe bw’Uburayi (EU/UE) na Canada, bisanzwe byaratumije uru rukingo, ndetse izindi doze miliyoni 500 zatumijwe mu buryo bwo gusaranganya inkingo ku isi mu bihugu bicyennye, buzwi nka Covax.

Perezida Joe Biden yashimagije icyo yise “inkuru nziza ku Banyamerika bose, ikaba ari n’intambwe yo kwishimira itewe“, ariko aburira ko “urugamba rukiri kure yo kuba rwarangira”.

Mu itangazo yasohoye nkuko BBC ibitangaza, Perezida Biden yagize ati: “Nubwo twishimira inkuru y’uyu munsi [ku wa gatandatu], nshishikarije Abanyamerika bose – mukomeze gukaraba intoki zanyu, mukomeze kutegerana kandi mukomeze kwambara agapfukamunwa”.

Akomeza ati: “Nkuko nabivuze inshuro nyinshi, ibintu biracyashobora kuba bibi cyane nanone uko ubwoko bushya [bwa coronavirus] bukwirakwira, kandi iyi ntambwe itewe ishobora kuburizwamo”.

Ni ibihe bihugu byamaze gutumiza urukingo Johnson & Johnson?

  • Ubwongereza – doze miliyoni 30
  • Umuryango w’Ubumwe bw’Uburayi (EU/UE) – doze miliyoni 200
  • Canada – doze miliyoni 38
  • Ibihugu bihuriye muri gahunda ya Covax – doze miliyoni 500

Munyaneza Theogene / intyoza.com

Umwanditsi

Learn More →