DR Congo: Ubwato bwari butwaye abantu basaga 700 bwarohamye hapfa abasaga 60…

Abategetsi muri Repubulika ya Demokarasi ya Kongo bavuga ko abantu barenga 60 bapfuye baguye mu mazi nyuma yuko ubwato barimo bubirindutse bukarohama mu ruzi Congo.

Abantu bagera kuri 300 barokowe, ariko abandi bishoboka ko bagera kuri 200 ntibizwi aho baherereye, nyuma y’iyo mpanuka.

Abahaturiye bavuze ko ubwato bwagonze ibuye rinini mu burasirazuba bw’umurwa mukuru Kinshasa, ubwo bwari mu rugendo nijoro, kandi bibujijwe.

Steve Mbikayi, Minisitiri wa DR Congo wo guhangana n’ibiza, yasabye ko ba nyir’ubwo bwato baregwa mu rukiko.

Yanditse kuri Twitter ati: “Ubwato bupakiye bwarengeje urugero, bugenda nijoro butwaye abagenzi barenga 700 bwarohamye i Mai-Ndombe! Imirambo 60 imaze kuboneka n’abarokotse 300!”.

Akomeza ati” Twifatanyije n’imiryango yabuze abayo kandi turashaka ko hafatwa ibihano ku bantu bose babikozemo amakosa bo mu rwego rwo gutwara abantu n’ibintu”.

Nkuko BBC dukesha iyi nkuru ibitangaza, muri iki gihugu hari imihanda micye, ndetse bimwe mu bikorwa byo gutwara abantu n’ibintu bikorerwa muri uru ruzi rwa Congo.

Munyaneza Theogene / intyoza.com