Ku wa 16 Nzeri 2021 mu Kagari ka Karugira, Umurenge wa Kigarama, Akarere ka Kicukiro hatangijwe ubukangurambaga bwo gukumira no kurwanya ikwirakwira ry’icyorezo cya Covid-19. Ni igikorwa cyabimburiwe n’urugendo rwahereye ku isoko rya MINI MARKET KIGARAMA riherereye mu kagari ka Karugira rizwi nk’iry’I Gikondo, aho bibutsaga abaturage gukaza ingamba zo kwirinda Coronavirus, ko ntaho icyorezo cyagiye, ko ahubwo hakenewe ukutadohoka ku ngamba.

Ubu bukangurambaga bwitabiriwe n’inzego zitandukanye zirimo iz’umutekano, ubuyobozi mu nzego z’ibanze, abamotari ba cooperative umuseke, abacuruzi bo mu isoko ndetse n’abajyanama b’ubuzima, aho aba bose bakoraga urugendo bagenda batanga ubutumwa bwo kwibutsa ingamba zo kwirinda ikwirakwira ry’icyorezo cya covid-19 bibutsa buri wese ko ntakudohoka.

Umunyamabanga Nshingwabikorwa w’ Akagari, NDIKUMWAMI Ezechiel yabwiye itangazamakuru ko ari ishema rya buri muturage kurinda abandi no kurwanya covid-19, ko ariyo mpamvu y’ubu bukangurambaga, ko kwigisha ari uguhozaho, ko abaturage badakwiye kudohoka kungamba zo kwirinda Covid-19. Ashimira abaturage uko birinda ndetse banarwanya Covid-19, akabibutsa ko ntakudohoka kuko icyorezo kigihari.

Yagize ati” Ubu bukangurambaga twakoze bugamije kwibutsa no gukangurira abaturage ko ntakudohoka mu kubahiriza amabwiriza yo kwirinda no gukumira ikwirakwira ry’icyorezo cya covid-19. Tugomba kuyikumira twivuye inyuma kuko iracyahari. Mu gihe abaturage baba babyumvise byadufasha kwesa imihigo twihaye ikubiyemo no kwirinda no kubahiriza amabwiriza ya covid-19”.

Urubyiruko rw’abakorerabushake muri uru rugendo rw’ubukangurambaga, batanze ubutumwa kuri bagenzi babo babibutsa ko arirwo mbaraga z’Igihugu zubaka kandi vuba, bavuga ko intego zarwo ari ugufatanya n’inzego zibishinzwe mu kurwanya covid-19 bakangurira abandi kwirinda kujya ahahuriye abantu benshi nko mubirori bitemewe n’ahandi habujijwe mu buryo bwo kwirinda, banasaba ko bakwitabira gufata urukingo rwa covod-19 ku batararuhabwa.

Abajyanama b’ubuzima batanze ubutumwa bati: “Ubuzima bwanjye nawe ni ingenzi, ndinda nkurinde turwanye covid-19 twipimishe kenshi gashoboka, niba kandi wanduye kurikiza amabwiriza uhabwa n’inzego zibishinzwe irinde kwanduza abandi NJYEWE NAWE TURI INGENZI MU GIHUGU”.

Isabella Iradukunda Elisabeth