Minisitiri ushinzwe ubuzima mu gihugu cya Tanzania, Muganga Dorothy Gwajima, avuga ko iki gihugu nta mugambi gifite wo gutumaho inkingo za coronavirus. Ahamya ko imiti gakondo ihagije mu kwikingira.

Mu kiganiro n’abanyamakuru ku mugoroba wo kuri uyu wa mbere tariki 01 Gashyantare 2021, ku murwa mukuru Dodoma, Minisitiri Gwajima yavuze ko muri Tanzania nta Covid-19 iriyo. Yasabye abanyagihugu gufata ingingo zo kwikingira harimo no gukoresha imiti gakondo.

Ati:”Muri uno mwanya Minisiteri y’ubuzima nta mugambi wo kwakira urukingo rwa corona cyangwa Covid-19, ruvugwa ko rumaze kuboneka rukaba rurimo rurakoreshwa mu bindi bihugu”.

Aya magambo ayashyikirije mu gihe icyegera cya mbere cy’umukuru wa Zanzibar, Maalim Seif Hamad Sharif, umugore we hamwe na bamwe mu bafasha be banduye coronavirus.

Avuga ko Leta inyuze muri Minisiteri y’ubuzima ifite inzira yayo ikurikiza iyo ishaka kwakira ibicuruzwa ibyo aribyo byose mu rwego rw’ubuzima.

Ari kumwe n’icyegera cye hamwe n’umuhanga mu bijyanye n’imiti gakondo wo mw’ishirahamwe rikora ubushakashatsi ku miti muri Tanzania, National Institute for Medical Research (NIMR), Madame Gwajima yerekanye uburyo uyu muti gakondo utegurwa hakoreshejwe tangawizi, ibitunguru, indimu hamwe n’ipiripiri.

Minisitiri Gwajima nkuko BBC ikomeza ibitangaza, avuga ko igihugu gitekanye ariko agasaba abanyagihugu gufata ingingo zo kwikingira bitewe n’uko iki cyorezo gikomeza gukwirakwira mu bihugu bituranyi.

Ati:” Rero icyo nshaka kuvuga, igihugu cyacu kiratekanye; turumva ko mu bihugu bituranyi hari ingorane, ntutegereze ngo iyi ndwara ive ku muturanyi yinjire iwawe kuko dusanzwe tugenderanira, rero twebwe turiteguye”.

Yongerako ati: “Iki nicyo kirwanisho utegerezwa/usabwa gukora hanyuma ukanywa, ukinonora imitsi/ugakora siporo, ukanywa amazi menshi, ukaruhuka, ubuvuzi kama/gakondo”.

Munyaneza Theogene / intyoza.com