Umukirisitu muri Afurika y’Epfo yarashe abajura bari bitwaje intwaro

Igipolisi cyo muri Afurika y’Epfo kirimo kirakora iperereza kw’iyicwa ry’abantu babiri bivugwa ko bari abajura bitwaje imbunda mu rusengero rwo mu mujyi wa Centurion mu Ntara ya Gauteng, nk’uko bitangazwa n’ibitangazamakuru byaho.

Aya makuru avuga ko kuri iki cyumweru tariki 26 Nyakanga 2020 abantu batatu bitwaje imbunda bateye mu rusengero rwa Querentia Ministry muri Wierdapark batangira kwambura abarimo gusenga.

Umwe mu barimo basenga witwa Pieter van der Westhuizen, asanzwe afite uburenganzira bwo gutunga no gutemberana imbunda, yashoboye kwica babiri muri abo bagabo mu gihe uwundi wari kumwe nabo yashoboye gutoroka.

Ikinyamakuru News24 kivuga ko Bwana Der Westhuizen ari mwenewabo na nyakwigendera w’umukinnyi w’ikipe y’igihugu ya Rugby uzwi cyane witwa Joost van der Westhuizen.

Mu ijambo rye yasubiwemo ku iradiyo yigenga, JacrandaFM, umuvugizi w’igipolisi cya Gauteng, Mathapelo Peters, BBC itangaza ko yavuze ati: “Hari itangazo twabonye ry’uwo mukiristu avuga ko yarashe abo bikekwa ko bari abajura kandi rizashyikirizwa abayoboye inzego z’ubucamanza”. Ayo makuru avuga ko umupasitori w’urwo rusengero yakomeretse buke kandi akaba yarahise avurirwa aho.

Munyaneza theogene / intyoza.com

Umwanditsi

Learn More →