Urban Boys yegukanye irushanwa rya Primus Guma Guma Super Star ya 6

Itsinda ry’abaririmbyi batatu rizwi ku izina rya Urban Boys niryo ryegukanye Miliyoni 24 n’ igikombe cya Primus Guma Guma Super Star cyahatanirwaga ku nshuro ya 6.

Mu ijoro ryo Kuri uyu wa gatandatu taliki ya 13 Kanama 2016, irushanwa ya Primus Guma Guma Super Star ya 6 ryari rimaze amezi hafi ane rizenguruka ibice bitandukanye by’u Rwanda yashorejwe i Remera ya Kigali iruhande rwa sitade ntoya mu kibuga cy’ahakunda kuberaho imurikagurisha, irushanwa ryegukanywe n’itsinda rya Urban Boys.

Iri tsinda rya Urban Boys ryegukanye PGGSS ya 6 rigizwe n’abasore batatu aribo; Safi Madiba, Humble Jizzo hamwe na Nizzo Kabosi( aya niyo mazina aba basore bazwiho cyane mu buhanzi bwabo).

Kwegukana iri rushanwa kwa Urban Boys, bihuriranye nuko ari bwo bwambere kuva ryatangira ryegukanye n’itsinda ry’abaririmbyi, inshuro eshanu zose zishize ryegukanwaga n’umuririmbyi ku giti cye.

Urban Boys kandi itwaye iri rushanwa benshi mubakurikiranira hafi ibya muzika bayihaga amahirwe bigendeye ku buryo yagiye yitwara hirya no hino mu bitaramo byakozwe, bijyanye kandi n’uko yigaragaje.

Urban Boys, uretse igikombe yanahawe igihembo cya Miliyoni 24 z'amafaranga y'u Rwanda.
Urban Boys, uretse igikombe yanahawe igihembo cya Miliyoni 24 z’amafaranga y’u Rwanda.

Uretse kuba Urban Boys itwaye iki gikombe, muyindi myanya uko bose bari muri iri rushanwa rya PGGSS 6, umwanya wa kabiri n’umwanya wa gatatu niyo myanya yateje uruntu runtu mubatari bake, umwanya wa kabiri wegukanywe na Christopher naho umwanya wa gatatu wegukanwa na Bruce Melodie.

Irushanwa rya Primus Guma Guma Super Star, risigiye itsinda rya Urban Boys ryabaye iryambere akayabo ka Miliyoni 24 mu mafaranga y’u Rwanda, uwatwaye umwanya wa Kabiri yegukanye Miliyoni 7.5 naho umwanya wa gatatu atwara miliyoni 7 z’amanyarwanda.

Dore uko abahanzi bari bari muri iri rushanwa rya Primus Guma Guma Super Star bakurikirana uhereye ku mwanya wa mbere:

                      1) Urban Boys

                      2) Christopher

                      3) Bruce Melodie

                      4) Danny Vumbi

                      5) Young Grace

                     6) Allioni

                     7) Jules Sentore

                     8) Danny Nanone

                     9) TBB

                    10) Umutare Gaby

Irushanwa rya Primus Guma Guma Super Star ryatangiye mu mwaka 2011, uwambere waritwaye yari Thom Close, irya kabiri ritwarwa na King James, irya gatatu ritwarwa na Riderman, ubwa kane ryegukanwa na Jay Polly, ku nshuro ya gatanu ritwarwa na Butera Knowless, hanyuma kuri iyi nshuro ya 6 ryegukanywe na Urban Boys.

Munyaneza Theogene / intyoza.com

Umwanditsi

Learn More →