Amerika yafatiye ibihano Abasirikare bahiritse ubutegetsi muri Myanmar

Leta zunze ubumwe z’Amerika yafatiye ibihano abategetsi b’igisirikare bakoze kudeta muri Myanmar. Perezida Joe Biden yatangaje kuri uyu wa 10 Gashyantare 2021 ko igisirikare gisabwa gusubiza ubutegetsi kigaruriye ku ngufu. Kirasabwa kandi kubahiriza ibyo abanyagihugu batoye mu matora yo kw’itariki ya 8 ukwezi kwa cumi na kumwe 2020.

Biden yatangaje ko Leta y’Amerika, irimo gufata ingamba zo kubuza abo ba jenerale kubona amamiriyaridi y’amadolari Amerika isanzwe ifashisha icyo gihugu. Biden kandi yasinye itegeko rya Perezida rihana abo bategetsi ba gisirikare bafashe iya mbere muri iyi kudeta, ubutunzi bwabo hamwe n’imiryango yabo.

Amerika izafatira ubutunzi bwabo bajenerali bafite muri Amerika, ariko imfashanyo mu rwego rw’ubuzima zizakomeza guhabwa abanyagihugu, amashyirahamwe yo muri sosiyete sivile no mu bindi bigo bifasha abanyagihugu.

Ku italiki ya 1 y’ukwezi kwa kabiri uyu mwaka wa 2021, igisirikare cya Myanmar cyahiritse ku ngufu ubutegetsi bwitorewe n’abanyagihugu, nyuma abanyagihugu bahita batangira imyigaragambyo igeze ku munsi wa gatanu.

Biden yavuze ko Amerika yiteguye gufata ibindi bihano birenze ibyo mu gihe ibintu byakomeza kuba bibi.

Umuryango w’Abibumbye-ONU hamwe n’andi mashyirahamwe mpuzamahanga bagaragaje impungenge bafite ku ikoreshwa ry’ingufu ku bakora imyigaragambyo.

Munyaneza Theogene / intyoza.com

Leave a Reply

Your email address will not be published. Required fields are marked *