Umutekano ku ngoro y’umukuru w’Igihugu wongeye guhungabana

Inzu y’umukuru w’Igihugu cya Leta zunze ubumwe za America “Maison Blanche” yafunzwe ku bera umutekano.

Kuri uyu wa mbere Taliki ya 30 Gicurasi 2016, Inzu y’umukuru w’Igihugu cya Leta zunze ubumwe za Amerika yafunzwe amasaha make ku mpamvu z’umutekano.

Ubusanzwe iyi nzu izwi nka “Maison Blanche” abantu baturutse hirya no hino bakunze kuyisura, kuri uyu wambere nta muntu n’umwe wemerewe kuyisura yemwe no kuyegera.

Abashinzwe umutekano mubiro bya FBI, batangaje ko gufunga iyi nyubako byabaye nyuma gato y’aho umugore yataye akantu mu ruzitiro rw’iyi nyubako, gusa nyuma ngo basuzumye basanga ako kantu katawe muruzitiro ntacyo kari gatwaye.

Iyi nkuru dukesha Ijwi rya Amerika, ivuga ko ibi byabaye nyuma gato y’aho Perezida Obama yari avuye kunamira abasirikare ba Amerika baguye k’urugamba bashyinguye ku irimbi riri hafi ya Washington DC, ku ruhande rwa Leta ya Virginiya.

Umugore wakoze ibi ngo yahise atabwa muri yombi n’inzego zishinzwe umutekano, umuryango wa Perezida Obama uratekanye nkuko byatangajwe n’inzegon’ubuyobozi.

Munyaneza Theogene / Intyoza.com