“eRosary”, ni ishapure y’ikoranabuhanga yatangijwe n’I Vatikani kwa Papa. Iyi shapure ije mu rwego rwo kwiyegereza urubyiruko aho muri iki gihe benshi muri rwo bakoresha cyane ikoranabuhanga mu mubuzima bwa buri munsi.

“eRosary”, ni ishapure y’ikoranabuhanga umuntu ashobora kwambara nk’umurimbo wo ku kaboko ariko igatangira gukora ari uko uyambaye akoze ikimenyetso cy’umusaraba.

Iyi Shapure, ihujwe na “application” yitwa “Click to Pray eRosary” yakorewe gufasha abakirisitu Gatolika gusengera amahoro. Iyi “app” ikwereka uko uhagaze mu kuvuga ishapure kandi ifite amashusho n’amajwi bisobanura ishapure.

Iyi shapure y’ikoranabuhanga si buri wese wo kuyigondera kuko nk’uko BBC dukesha iyi nkuru ibivuga, igura amadolari ya Amerika 109 (agera mu bihumbi 100 y’u Rwanda).

Itangazo rya Click to Pray, abakoze iyi shapure nshya y’ikoranabuhanga rivuga ko “ Ije guhuza uburyo busanzwe bwo gusenga n’ikoranabuhanga rigezweho ku Isi”. Agakoresho k’iyi shapure kakozwe na kampuni y’ikoranabuhanga yo muri Taiwan yitwa GadgTek Inc.

Iyi shapure, ntacyo ishobora kuba nubwo yaba iri mu mazi. Ikorana kandi na Telefone zigezweho zikoresha Android na iOS.

Si ubwambere Kiriziya Gatolika igerageza kwiyegereza urubyiruko rugendana cyane n’ikoranabuhanga muri iki gihe kuko nko muri 2018, umuryango Gatolika w’ivugabutumwa watangije “Follow JC Go!”. Iyi ni “app” y’imikino ikoze nk’umukino wa Pokemon Go. Abawukina bagenda “bafata” abatagatifu aho gufata ibisimba nko muri Pokemon.

intyoza.com