Kongere y’ishyaka CNDD-FDD yateranye kuri uyu wa 26 Mutarama 2020 yamaze kwemeza ko Jenelari Majoro Ndayishimiye Evariste ariwe uzahagararira iri shyaka mu matora y’umukuru w’Igihugu ateganijwe mu kwezi kwa Gatanu uyu mwaka.

Kuba ishyaka CNDD-FDD rigennye uyu Gen. Maj Ndayishimiye kuba ariwe uzarihagararira mu matora y’umukuru w’Igihugu ateganijwe, ntabwo byatunguranye kuri benshi kuko kuva yareka igisirikare akagirwa umunyamabanga mukuru waryo mu mwaka wa 2016, byagiye bihwihwiswa kenshi ko ariwe urimo gutegurirwa kuzahagaraira iri shyaka mu matora nyuma y’aho Perezida Petero Nkurunziza atangarije ko nta manda yindi aziyamamariza nyuma y’igitutu cy’Abarundi.

Ndayishimiye Evariste, kubazi amateka ye bavuga ko ari umuntu wa hafi cyane wa perezida Nkurunziza kuva cyera ndetse no mu gihe bari bakiri mu ishyamba barwanira ubutegetsi. Kugeza uyu munsi izina rye rirakomeye kandi ni umwe mubizerwa ndetse watumwaga ahakomeye.

Gutorerwa kuzahagararira ishyaka CNDD-FDD mu matora, bihise bikuraho ibyo benshi bibwiraga ko Perezida Petero Nkurunziza ashobora kwanga kurekura ubutegetsi akiyongeza indi Manda.

Jenelari Ndayishimiye Evariste, yatorewe kuba Umunyamabanga mukuru w’ishyaka CNDD-FDD ari naryo riri ku butegetsi kuva mu kwezi kwa Munani 2016.

Ndayishimiye Evariste, yavutse mu mwaka wa 1968 mu Ntara ya Gitega, aho uyu munsi iyi Ntara yagizwe umurwa mukuru w’u Burundi mu bya Politiki guhera mu mwaka wa 2018. Ni umwe kandi mu bacitse ku icumu ry’ubwicanyi bwakorewe abanyeshuri b’Abahutu muri kaminuza y’u Burundi mu kwezi kwa Gatandatu 1995.

photo/internet

Munyaneza Theogene / intyoza.com