Mu ijoro ryo kuri uyu wa 26 Gashyantare 2020, mu Mudugudu wa Mukoni, Akagari ka Kavumu, Umurenge wa Busasamana ho mu Karere ka Nyanza, Abapolisi bari mukazi bafashe abagabo babiri bari bapakiye nabi ibiti mu modoka ya Mitsubish FUSO RAB 458G. Aba bagabo, aho kwemera kwandikirwa amakosa bakoze bashatse guha Abapolisi ruswa y’amafaranga ibihumbi bitatu, bahita batabwa muri yombi.

Umuvugizi wa Polisi y’u Rwanda mu ntara y’Amajyepfo, Chief Inspector of Police(CIP) Sylvestre Twajamahoro, yabwiye intyoza.com ko aba bagabo babiri bageze ku bapolisi bari mukazi, ubwo bari bagiye kubandikira babahanira ko bapakiye nabi ibiti mu modoka mu buryo bubangamiye gahunda ya Gerayo Amahoro, aho kwemera guhanwa bashaka gutanga ruswa y’amafaranga y’u Rwanda ibihumbi bitatu(3,000Frws).

Ati” Abapolisi bari kuri night snack Check-Point( mu muhanda hamwe abapolisi baba bashyize mu muhanda ibigaragaza ko bari mukazi) yakoreraga aho bita ku bigega bafashe abagabo 2 ubwo babahaga Ruswa y’amafaranga 3000 kugirango batabahanira ikosa ryo gupakira nabi bari babafatiyemo.Abo ni ABIMANA Donath(29yrs)uyu akaba yari atwaye imodoka MITSUBISH FUSO RAB 458G ikaba yari ipakiye ibiti byo kubakisha na BAREKE Festus(49yrs)uyu akaba ariwe nyiri umuzigo”.

Akomeza ati” Bavaga HUYE bagiye i Nyamata ari naho bari bajyanye ibyo biti. Ubwo bageraga ku ba polisi bagiye kubandikira abandi bababwira ko bafite Fanta 3, bahereza umwe mu bapolisi bari aho mu kazi inoti 2 zigizwe n’imwe ya 2,000 n’indi y’1,000 bayazingiye muri Carte jaune kugirango abafashe bikomereze. Ayo mafaranga yatanzwe na Chauffeur ayahawe na nyir’umuzigo”.

CIP, Twajamahoro, avuga ko aba bagabo babiri bakekwaho guha ruswa abapolisi bashyikirijwe urwego rw’Ubugenzacyaha-RIB rukorera mu Murenge wa BUSASAMANA hamwe n’ibyo bafatanywe kugirango bakurikuranywe ku cyaha bakekwaho. Mu gihe imodoka nayo ifungiye kuri DPU Nyanza kugira ngo ibiti ipakiye babanze babipakire neza kugira ngo bidateza impanuka.

Munyaneza Theogene / intyoza.com