Dr Lorna Breen w’imyaka 49 y’amavuko wari mu baganga wavura abarwayi ba CoronaVirus mu mujyi wa New York muri Amerika, yapfuye yiyahuye kuri iki cyumweru Tariki 26 Mata 2020. Yazize ibikomere yiteye ubwe nkuko Polisi yabitangaje. Yari umuganga mu ishami ryita ku ndembe mu bitaro biri I Manhattan.
Dr Philip Breen, Se ubyara Dr Breen yabwiye ikinyamakuru New York Times ati: “Yagerageje gukora akazi ke ariko karamwica”. Akomeza avuga ko umukobwa we nta kibazo yajyaga agira cy’uburwayi bwo mu mutwe. Yiyahuriye aho yari atuye muri Virginia, aho yabanaga n’umuryango we.
Leta ya New York yonyine nkuko BBC dukesha iyi nkuru ibivuga, ibarura abantu 17,500 bamaze gupfa mu bantu 56,000 bose hamwe bamaze kwicwa na Covid-19 muri Amerika.
Dr Lorna Breen mu gihe cy’akazi ke nawe yarwaye coronavirus ariko agaruka mu kazi nyuma y’icyumweru n’igice amaze koroherwa nk’uko se abivuga.
Se, avuga ko ibitaro yakoreraga byari byongeye kumwohereza mu rugo, ntiyabyemera kugeza ubwo umuryango we umusabye kubyemera agataha.
Se, avuga ko ubwo aheruka kuvugana n’umukobwa we yari mu gahinda, akamubwira uburyo abantu bari kwicwa na Covid-19 kugeza ubwo hari n’abapfa batarabavana mu modoka zitwara indembe.
Ati: “Mu by’ukuri yari mu bari ku murongo wa mbere muri uru rugamba. Tumubona nk’intwari kimwe n’abandi bose bamaze kugwa kuri uru rugamba”.
New York Times ivuga ko Dr Lorna Breen yari umukirisitu ukomeye, yari umuntu ukunda guceza injyana ya salsa ndetse ko rimwe mu cyumweru yahaga umwanya we inzu z’abashaje.
Ibitaro yakoreraga byasohoye itangazo bivuga ko “Dr Breen ari intwari yazanye umuti ku rugamba rukomeye mu ishami ryo kuvura indembe”.
Polisi yatangaje ko nyuma yo gutabazwa tariki 26 z’uku kwezi, Dr Breen yajyanywe ku bitaro ngo avurwe ariko “akicwa n’ibikomere yiteye ubwe“.
Ukuriye polisi muri aka gace mu itangazo yasohoye, yavuze ko “Abaganga bari muri uru rugamba nabo bashobora kwibasirwa n’indwara zo mu mutwe bitewe n’iki cyorezo”.
Uyu avuga ko aba bakozi basanzwe bakora akazi kagoranye cyane, “none coronavirus ikaba yarongereye ugukomera kw’akazi kabo”.
Leta ya New York imaze kubonekamo hafi 1/3 cy’abamaze kwandura bose hamwe muri Amerika ubu basatira miliyoni imwe.
intyoza.com
