Tanzania yagize abantu 196 banduye Covid-19 umunsi umwe, nyamara yaburiwe na OMS 

Mu gihugu cya Tanzania kuri uyu wa 29 Mata 2020, nibwo batangaje umubare munini w’abantu 196 banduye CoronaVirus umunsi umwe. Byatumye imibare y’abamaze kwandura izamuka iba abantu 480, ari nacyo gihugu gihise kigira abantu benshi banduye muri aka karere.

Mu bantu 196 batangajwe, barimo 22 bari batangajwe mbere na Zanzibar. Bivuze ko abanduye coronavirus muri Tanzania ndetse na Zanzibar, bose hamwe ubu bamaze kuba 480.

Minisitiri w’Intebe wa Tanzania, Kasim Majaliwa yabwiye abanyamakuru ko umubare w’abamaze kwicwa n’iyi ndwara wiyongereyeho abantu batandatu (6) bakaba bose hawe 16.

Minisitiri w’Intebe Majaliwa ariko yanavuze inkuru nziza ko abamaze gukira nabo biyongereyeho 48 bakagera kuri 167.

Uko imibare y’abanduye ihagaze muri aka karere:

  • Tanzania: 480
  • Kenya: 384
  • Rwanda: 225
  • Uganda: 79
  • Sudani y’Epfo: 34
  • Burundi: 14

Nkuko BBC dukesha iyi nkuru ibivuga, Umurwa mukuru w’ubucuruzi wa Dar es Salaam niwo urimo umubare munini w’abanduye Covid-19 muri Tanzania. Ku bakomeje gusaba ko uyu mujyi, ubamo abantu miliyoni esheshatu, wafungwa ubuzima busanzwe bugahagarikwa, Perezida Magufuli yavuze ko ibyo bidashoboka.

Yagize ati: “…Ibyo ntibishoboka. Dar es Salaam niho hantu honyine hava imisoro y’igihugu cyacu…Hejuru ya 80% y’iyo misoro iva Dar es Salaam”.

Ibi birimo biraba nyamara OMS/WHO yari yaraburiye iki Gihugu;

Imibare y’abanduye iri kuzamuka muri Tanzania nyuma y’uko ishami ry’umuryango w’abibumbye ryita ku buzima OMS/WHO ryaburiye Leta kubera kudafata ingamba kare mu kwirinda iki cyorezo.

Tariki 24/04/2020 Madamu Matshidiso Moeti uyobora OMS muri Tanzania yavuze ko bafite ubwoba bwinshi ko imibare y’abanduye coronavirus iziyongera muri iki gihugu.

Dr Moeti yabwiye abanyamakuru ati:”Tubona neza ko kubuza abantu guhura ari benshi no guhagarika ibikorwa bihuriramo abantu benshi byatinze, dutekereza ko ibi aribyo biri gutuma tubona imibare yiyogera”.

Mu minsi ishize, Leta ya Tanzania aho gufata ingamba z’iki cyorezo, yatangaje iminsi itatu yo gusengera iyi ndwara ngo irangire. Gusa ntiyabujije abantu guhurira mu nsengero, mu gihe guhura kw’abantu benshi bivugwa n’abahanga nk’inzira yo kwihuta kw’iki cyorezo.

Nubwo Leta ya Tanzania itafashe ingamba zikomeye nk’izo mu bihugu bituranyi nka Uganda n’u Rwanda, hari zimwe muzo yafashwe mu bihe bishize zirimo;

  • Amashuri yose yarahagaritswe
  • Ibitaramo bya muzika, imikino, n’ibiterane by’abantu benshi cyane bya politiki byarahagaritswe
  • Imodoka zitwara abantu muri rusange zibujijwe kuzuza abagenzi kandi abarimo bose bagomba kuba bicaye
  • Indege zitwara abagenzi zabujijwe kugwa muri Tanzania
  • Kuva kuwa mbere w’icyumweru gishize abantu bose bagiye mukazi bategekwa kwambara udupfukamunwa bari ahari abandi.
  • Inzu zose z’uburiro muri Dar es Salaam zategetswe guha abantu ibiribwa bakabitwara ntibabirire muri izi nzu.

intyoza.com

Umwanditsi

Learn More →