Abategetsi b’Igihugu cya Lesotho by’umwihariko Minisiteri y’Ubuzima, batangaje kuri uyu wa Gatatu tariki 13 Gicurasi 2020 ko babonye umuntu umwe wanduye icyorezo cya Covid-19. Iki gihugu giherereye muri Afuriya y’epfo, nicyo rukumbi ku mugabane wa Afurika cyari gisigaye kitarabonekamo iki cyorezo.

Abategetsi ba Lesotho, batangaza ko uyu muntu ubu yashyizwe mukato nyuma y’aho bamusanzemo iki cyorezo ubwo yapimwaga nyuma y’iminsi 5 ageze muri iki gihugu. Bavuga kandi ko nta bimenyetso yagaragazaga.

Uyu wagaragaweho Covid-19, VOANews dukesha iyi nkuru itangaza ko abategetsi b’iki Gihugu bavuga ko yazanye n’abandi bagenzi benshi bavuye muri Alabiya Saudite ( Saudi Arabia) ndetse no muri Afurika y’Epfo, aba ariwe wenyine basangamo iki cyorezo.

Igihugu cya Lesotho gikikijwe na Afurika y’Epfo kugeza ubu, iza ku mwanya wa mbere mu kugira abantu benshi bapimwe bagasanganwa Covid-19, aho ibarurwamo abanduye 11,350. Uyu muntu kandi abonetse nyuma y’icyumweru iki gihugu cyoroheje ingamba zo kwikingira( Guma mu rugo).

Umugabane wa Afurika urabarurwamo abanduye icyorezo cya Covid-19 basaga ibihumbi 70, mu gihe abasaga 2,400 bamaze gupfa bazira iki cyorezo naho abasaga 24,800 barakirokotse.

Munyaneza Theogene / intyoza.com