Amakuru agaragara mu nyandiko iri ku mbuga nkoranyambaga nk’urwa Minisiteri y’Ububanyi n’Amahanga y’ u Burundi, agaragaza ko hari abantu bane (4) badakenewe muri iki Gihugu barimo uhagarariye ishami ry’Umuryango w’Abibumbye ryita ku buzima-OMS/WHO.

Iyi nyandiko yashyizwe hanze kuwa 12 Gicurasi 2020, igaragara nk’iyanditswe n’iyi Minisiteri, imenyesha ko Dr Walter Kazadi Mulombo uhagarariye OMS/WHO mu Burundi, n’abandi bakozi b’uyu muryango aribo; Pr. Tarzy Daniel, Dr Ruhana Mirindi Bisimwa hamwe na Dr Jean Pierre Murunda Nkata bategetswe kuba bavuye ku butaka bw’u Burundi mbere ya Tariki 15 Gicurasi 2020.

Ezechiel Nibigira, Minisitiri w’ububanyi n’amahanga w’u Burundi, yabajijwe na BBC dukesha iyi nkuru ku kuri kw’iriya nyandiko igaragara ku rubuga rwa Minisiteri ayoboye ariko ntiyahakana cyangwa se ngo yemeze ibivugwa muri iyo nyandiko.

Umwe mu bakozi ba minisiteri y’ububanyi n’amahanga utifuje gutangazwa, yemereye BBC ko iriya nyandiko ari iy’ukuri kandi ari iya minisiteri y’ububanyi n’amahanga.

Iyi nyandiko ntabwo isobanura impamvu yo kwirukanwa kw’aba bantu bane.

Ishami ry’umuryango w’abibumbye ryita ku buzima OMS/WHO, naryo ntacyo riratangaza kuri iri yirukanwa ry’urihagarariye mu Burundi. OMS niyo iyoboye ibikorwa byo kurwanya coronavirus ku isi.

Mu Burundi, Leta ivuga ko hamaze kuboneka abantu 27 banduye coronavirus 11 bayikize n’umwe yishe. Mu gihe hakomeje ibikorwa byo kwiyamamaza bihuza abantu benshi cyane begeranye, hari abagaragaza impungenge ko iki cyorezo gishobora kwiyongera mu gihugu.

intyoza.com