Ubuyobozi bwa Kiriziya Gatolika mu Burundi, bwemeza ko bwakurikiraniye hafi amatora y’Umukuru w’Igihugu yabaye kuwa 20 Gicurasi 2020, ndetse ngo bwohereje indorerezi zirenga 2700 mu gihugu hose. Abategetsi ba Kiriziya Gatolika bahamya ko aya matora yaranzwe n’ubujura.
Inama y’abepiskopi Gatolika, ivuga ko nubwo izo ndorerezi zari nke ugereranije n’uburyo igihugu kingana, zashoboye kugera mu makomine yose y’igihugu bijyanye n’uburyo bari batoranije aho bashyira ijisho/bareberera kurusha ahandi.
Icyegeranyo abo Bepiskopi Gatolika bashyize hanze cyerekana ko amatora yabayemo ubujura budasanzwe harimo; ukwiba amajwi, guhimba imibare, cyangwa se aho abantu batoye inshuro nyinshi.
Musenyeri Joachim Ntahondereye, umukuru w’inama y’abepesikopi Gatolika mu itangazo yasomye, yavuze ku bikorwa byo gutera ubwoba byakorewe abahagarariye amashyaka amwe n’amwe kugira ngo bemere basinye ku byegeranyo by’ibyavuye mu matora, kwiba amajwi cyangwa guhimba imibare ahatari hake, ahabonetse abatoye mu mwanya w’abapfuye cyangwa bahunze, abatumye ngo babatorere bidakurikije amateko kandi bigakorwa kenshi, ahabonetse abanyagihugu batoye inshuro nyinshi.
Kwirukana abaserukira amashyaka n’izindi ndorerezi igihe cyo kubarura amajwi kigeze, igitsure no gutera ubwoba abatora bikozwe n’abatware babaherekeza kugeza no mu tuzu tw’amatora, abantu batazwi aho bavuye binjira aharimo habarurirwa amajwi, ibanga mu kubarura ritubahirijwe hamwe no kwaka amatelefone n’ibiranga indorerezi zimwe zimwe
Abo basenyeri Gatolika, nkuko ijwi rya Amerika dukesha iyi nkuru ribivuga, babona ko izo nenge zagaragaye zituma amajwi yatangajwe ko yavuye muri ayo matora atari yo. Gusa, bahamagarira uwabona ko yarenganijwe kwegera ubutabera.
Imibare ndakuka y’ibyavuye mu matora, bizamenyekana taliki 4 z’ukwezi kwa kamena 2020. Hagati aho, Ishyaka riri ku butegetsi mu mwanya w’umukuru w’igihugu ryabize amajwi 68.72% naho CNL bihanganye igira 24.19%. Abitabiriye amatora barenga 87% by’abari biyandikishije gutora.
intyoza.com
