Jenerali James Mattis wabaye umunyamabanga wa Amerika ushinzwe ingabo, yamaganye Perezida Donald Trump avuga ko ahembera amacakubiri akanakoresha nabi ubutegetsi afite. Gen. Mattis, yanabaye umugaba w’ingabo za Amerika mu gihe cy’intambara zo mu kigobe cya Perse, Afghanistan na Iraq. Anavuga ko Trump agaragaza ubutegetsi budakuze.
Mu buryo budasanzwe ko abwira imbaga, Gen. Mattis yavuze ko Perezida Trump yashatse ‘gucanishamo‘ abaturage ba Amerika kandi yananiwe no ‘gutegeka bikwiriye’.
Jenerali Mattis wari umugaba w’ingabo mu ntambara y’ikigobe cya Perse, iya Afghanistan n’iya Iraq, “yavuze ko arakajwe kandi ababajwe” n’uburyo Trump ari kwitwara ku myigaragambyo iriho.
Perezida Trump utajya aripfana, mu kumusubiza, yavuze ko Bwana Mattis ari “umujenerali wiha agaciro karenze“, ko yishimiye ko yavuye mu mwanya yari afite.
Jenerali Mattis yeguye ku mwanya we mu kwezi kwa 12 kwa 2018 nyuma y’uko Trump ategetse ko ingabo za Amerika ziva muri Syria. Kuva icyo gihe yaranzwe no guceceka cyane, kugeza ubwo ejo kuwa gatatu Tariki 03 Kamena 2020 yamaganye ubutegetsi bwa Trump mu kinyamakuru The Atlantic Magazine.
Mu kumusubiza vuba vuba, Perezida Trump yanditse ubutumwa bw’uruhererekane kuri Twitter aho anavuga ko ari we wirukanye Mattis. Yanditse ati: “sinakunze “imiyoborere” ye cyangwa se n’ibindi kuri we, n’abandi kandi ni uko”. Yongeraho ko yishimiye ko yagiye.
Hari ibindi Gen. Mattis yavuze
Mu kinyamakuru Atlantic, Gen. Mattis yanditse ati: “Donald Trump niwe muperezida wo mu gihe cyanjye utarigeze agerageza kunga ubumwe bw’Abanyamerika, ntiyigeze anerekana ko yagerageje. Ahubwo agerageza kudutanya”.
Akomeza avuga ko ibyo Abanyamerika bari kubona ari ingaruka z’uwo muhate wa Trump. Ati: “turi kubona ingaruka z’imyaka itatu y’ubutegetsi budakuze”.
Gen. Mattis yanavuze ku rupfu rwa George Floyd rwateje imyigaragambyo ubu imaze iminsi icyenda mu mijyi itandukanye muri Amerika.
Ibyakorewe Floyd ejo kuwa gatatu ariki 03 Kamena 2020 byazamuwe mu kiciro byitwa icyaha cy’ubwicanyi bw’ikiciro cya kabiri bivuye ku bwicanyi bw’ikiciro cya gatatu.
Abandi bapolisi batatu bari kumwe na Derek Chauvin watsikamiye Floyd akoresheje ivi bikamuviramo urupfu, nabo ubu bashyizwe mu bashinjwa.
Gen. Mattis, nkuko BBC dukesha iyi nkuru ibitangaza, yanenze ubwo bwicanyi bwakozwe n’abapolisi, avuga ko ari ibintu bikorwa na bacye bica amategeko, ko abigarambya ari abaharanira ko Amerika ibaho igendera ku mategeko.
Yanenze ikoreshwa ry’ingabo mu guhangana n’imyigaragambyo, ati: “Sinigeze nanarota ko ingabo…mu bubwo ubwo aribwo bwose, zishobora koherezwa kubangamira uburenganzira abaturage bahabwa n’itegekonshinga“.
Yongeraho ko “gushyira ingabo muri iki kibazo nk’uko byagaragaye i Washington DC, biteza ubushyamirane hagati y’igisirikare na rubanda“. Yakomeje kandi anegura igikorwa cya Trump cyo kujya kwifotoreza ku kiliziya abashinzwe umutekano babanje gukoresha imbaraga mu gutatanya abigaragambya hafi aho ngo atambuke.
Avuga ko ari “ugukoresha nabi ubutegetsi“. Kuri ibi byavuzwe na Gen. Mattis, Perezida Trump aherutse gutangaza ko gusura iriya kiliziya ari ibintu “byakozwe neza” ko kandi “abakuriye amadini babikunze”.
Imyigaragambyo yamagana ivanguramoko n’iyicwa rya George Floyd muri Amerika yakomeje mu mijyi itandukanye mu ijoro ryo kuwa gatatu, birengagije amategeko y’umukwabu. Ibipimo ku murambo wa Bwana George Floyd byerekanye ko mu ntangiriro z’ukwezi kwa kane yarwaye coronavirus. Gusa abarikoze bashimangiye ko iyi virus nta ruhare yagize mu rupfu rwe.
Munyaneza Theogene / intyoza.com
