Ubwo yatangiraga ibikorwa byo kwiyamamariza indi manda nk’umukuru w’Igihugu cya Amerika, Trump yabwiye abitabiriye kwiyamamaza kwe ko yabwiye abashinzwe ibyo gupima icyorezo cya Coronavirus ko bagomba kugenza make, umuvuduko mu gupima abantu banduye ukagabanywa. Abitabiriye uku kwiyamamaza bari mbarwa.
Mu ntangiriro z’iki cyumweru dusoza, Perezida Trump yari yigambye ko hafi abantu bagera kuri Miliyoni biyandikishije ngo bashobore kwitabira uko kwiyamamaza kwe kwabereye mu mujyi wa Tulsa ho mu ntara ya Oklahoma.
Hagati aho, icyo kibuga gisanzwe gifite imyanya 19.000 nta n’ubwo abitabiriye uku kwiyamamaza banegereje imyanya y’abateganijwe kujya muri iki kibuga mu gihe yari yiteze ko abantu bashobora kurenga kugera n’aho hategurwa indi myanya hanze y’ikibuga.
Mu gihe hari abatewe amakenga n’uko kwiyamamaza kubaye mu gihe iki gihugu cyugarijwe n’icyorezo cya Coronavirus, Perezida Trump yafashe umwanya muremure avuga kuri iki cyorezo.
Mu ijambo Perezida Trump yabwiye abari bitabiriye ukwiyamamaza kwe, yavze ko yasabye ababishinzwe kugabanya umurindi wo gupima Covid-19 kubera ko abenshi muri bo basanga baranduye. Avuga ko igikorwa cyo gupima ari “inkota“.
Agira ati: Ehe reka mbereke ikibi kirimo; Iyo urimo upima ku rugero runini gutyo, uzahora ubona abantu benshi, kandi uzabona benshi banduye. Rero nababwiye nti “gabanya akariro ko gupima. Barapima bakaguma bapima!”.
Abinjira muri uko kwiyamamaza bose nkuko BBC dukesha iyi nkuru ibitangaza, basabwa gusinya ku rwandiko rwo kemeza ko Trump nta ruhare azaba afite mu gihe hagira abandurira muri uko kwiyamamaza.
Aho hari haciye amasaha makeya mbere y’uko ibikorwa bitangira, abategetsi bavuga ko batandatu mu bashinzwe gutegura uko kwiyamamaza bari bapimwe bagasanga baranduye.
Hagati aho, ntibiboneka neza igituma abitabiriye uko kwiyamamaza bari bakeya ugereranije n’abari bitezwe. Trump yagereranije abashoboye kwinjira mu kwiyamamaza nk'”abarwanyi“, maze yifatira mu gahanga ibitangazamakuru n’abari mu myigaragambyo yo kwamagana ivangura moko rikorerwa abirabura ko ari bo batumye abanywanyi biwe batitabira.
Perezida Trump avuga kuwo bahanganye wo mu ishyaka ry’aba Democrates Joe Biden, Trump yamwise “icyitso cy’agatsiko k’abantu b’intagondwa“.
Hafi y’aharimo kubera uku kwiyamamaza habereye ugushyamirana ariko kudakomeye kuko nta n’icyo byangije.
Kuva Amerika yinjira mu gihe cya gahunda ya “Guma mu rugo”, kubera Coronavirus, uko kwiyamamaza niryo huriro rihuje abantu benshi rikabera mukibuga, bikaba bibaye mu gihe imibare y’abandura muri iyi ntara ya Oklahoma igenda yiyongera.
Mu gihugu cyose cya Amerika, abantu barenga miliyoni 2.2 nibo bamaze gutangazwa ko banduye icyorezo cya Coronavirus, abandi barenga 119.000 bakaba barahitanwe nacyo.
Munyaneza Theogene / intyoza.com
