Hatangiye igeragezwa ry’urundi rukingo rwa Covid-19 ku bantu

Mu gihugu cy’Ubwongereza, hatangiye igikorwa cy’igeragezwa ry’urundi rukingo rushya rwa Covid-19 ku bantu babishaka. Biteganijwe ko abagera kuri 300 aribo bazaterwa uru rukingo mu byumweru biri imbere. Ni igeragezwa ririmo gukorwa na kaminuza ya Imperial College London. Iri geragezwa ngo rigeze neza, abantu mu bice bitandukanye by’Isi batangira kuruhabwa mu ntangiriro z’umwaka wa 2021.

Igerageza ry’uru rukingo ku nyamaswa ryerekanye ko ntacyo rutwara kandi rukangura ubwirinzi bw’umubiri. Abahanga ba Kaminuza ya Oxford, nayo yo mu Bwongereza, bamaze igihe batangiye igerageza rya mbere ry’urukingo ku bantu, muri iki cyumweru rwatangiye kugeragezwa no muri Afurika. Izindi nkingo zigera ku 120 ziri gukorwa ahatandukanye ku isi.

Kathy, umugore w’imyaka 39 watewe uru rukingo rwa Kaminuza ya Imperial, avuga ko yabyemeye kuko ashaka kugira uruhare mu kurwanya iyi virus.

Ati:”Nzi neza ko ibintu bitazongera kumera nka mbere igihe cyose urukingo rutaraboneka, ni yo mpamvu nashatse kugira uruhare rwanjye mu kubigeraho.”

Nyuma y’iki cyiciro cya mbere, icyiciro cya kabiri giteganyijwe mu kwezi kwa cumi aho abantu 6,000 bazaruterwa.

BBC dukesha iyi nkuru itangaza ko Ikipe ya Imperial London College iri muri iki gikorwa ivuga ko yizeye ko uru rukingo rushobora gutangira guhabwa abantu mu Bwongereza no mu mahanga mu ntangiriro ya 2021.

Icyo wamenya ku rukingo rushya?

Inkingo zisanzwe zikorwa hifashishijwe virus yahinduwe cyangwa yaciwe intege, cyangwa ibice byayo, ariko urukingo Imperial iri kugerageza rukoze mu buryo bushya bwitwa RNA bwo kwigana iyi virus.

Iyo uru rukingo rutewe mu mubiri, iyo RNA yikoramo izindi nyinshi zigakwira, zikongera umubwirinzi bw’umubiri mu kurwanya iyo virus imeze gutyo.

Ibyo bishobora gutoza umubiri kumenya no kurwanya coronavirus mbere y’uko umuntu arwara Covid-19.

Prof Robin Shattock uyoboye iri gerageza ati: “Mu mezi macye, twabashije gukora urundi rukingo rushya tubasha no gutangira kurugerageza ku bantu. Niba ibyo turimo bigenze neza uru rukingo rukarinda abantu iki cyorezo, bishobora kuzana impinduka z’uburyo abantu bahangana n’ibyorezo mu gihe kiri imbere”.

Kathy, umwe mu bantu barutewe, avuga ko ashaka kugira uruhare mu kurwanya iyi virus.

Ubu bushakashatsi Leta y’Ubwongereza yabushyizemo miliyoni 41 z’amapawundi akoreshwa muri icyo gihugu, n’ayandi y’impano bwahawe agera kuri miliyoni 5 z’amapawundi.

Munyaneza Theogene / intyoza.com

Umwanditsi

Learn More →