Leta y’Igihugu cya Uganda yatangaje ko igiye gufungura igice cy’umupaka uyihuza na Repubulika iharanira Demokarasi ya Congo kugira ngo impunzi zigera ku 3,000 z’abanyecongo zinjire muri iki gihugu. Bivugwa ko izi mpunzi ari iziri guhunga ubushyamirane buri mu burasirazuba bwa DR Congo.
Igihugu cya Uganda, gisanzwe gicumbikiye impunzi zirenga miliyoni imwe ziganjemo izo mu karere, gusa yari yarafunze imipaka mu kwezi kwa gatatu mu kwirinda ikwirakwira ry’icyorezo cya coronavirus.
Izi mpunzi bafunguriye umupaka zirabanza gushyirwa mu kato mbere yo gutuzwa mu nkambi nk’uko umunyamakuru wa BBC muri Uganda abivuga.
Hashize ukwezi ibihumbi by’abavuye mu byabo muri DR Congo baraheze mu gace ka Ituri kegereye umupaka wa Uganda bifuza guhungira muri iki gihugu. Leta ya Uganda amaherezo ubu yabemereye kwinjira.
Bazabanza bamare iminsi 14 mu kato mu kigo gishya cyabugenewe kiri kuri 13Km uvuye ku mupaka. Ishami rya UN/ONU rishinzwe impunzi rivuga ko hazafatwa ibipimo bya bamwe muri izi mpunzi kugira ngo barebe niba badafitemo abanduye coronavirus. Ibi ngo bizafasha ababishinzwe kumenya igihe bazajyanwa mu nkambi.
Imiryango nterankunga igaragaza ibibazo byo kubahiriza amabwiriza yo kutegerana n’isuku mu nkambi z’impunzi. Mu bantu hafi 900 banduye coronavirus muri Uganda muri bo 52 ni impunzi.
Umuryango w’abibumbye nkuko BBC dukesha iyi nkuru ikomeza ibitangaza, uvuga ko uhangayikishijwe n’ubushyamirane bwongeye kubura mu burasirazuba bwa Congo, ahasanzwe hari impunzi miliyoni 5 imbere mu gihugu zavanywe mu byazo.
Munyaneza Theogene / intyoza.com
