Umugore umwe mu bigaragambyaga kuri uyu Gatandatu tariki 04 Nyakanga 2020 yapfuye agonzwe n’ imodoka yinjijwe mu itsinda ry’abari mu myigaragambyo mu muhanda wari wafunzwe mu mujyi wa Seattle, nk’uko abategetsi babitangaje. Ni imyigaragambyo yari yateguwe n’abagore mu kwamagana ihohoterwa rikorerwa Abirabura b’Abanyamerika.
Abashinzwe umutekano muri leta ya Washington banditse ku rubuga rwa Twitter ko “iyo modoka yinjiye ku ngufu muri uwo muhanda igonga abatari bake”.
Summer Taylor w’imyaka 24 y’amavuko yapfuye haciye amasaha makeya, mu gihe uwa kabiri nawe yakomeretse cyane. Ukekwa ko yakoze iryo bara yatawe muri yombi.
Kuva umunyamerika w’umwirabura George Floyd apfiriye mu maboko y’abapolisi mu mujyi wa Minneapolis mu kwezi kwa Gatanu kw’uyu mwaka wa 2020, Umujyi wa Seattle uhoramo imyigaragambyo yo kwamagana ivangura.
Iyo myigaragambyo, iri mu rukurikirane rw’iyindi ikomeza mu gihugu hose muri Leta Zunze Ubumwe za Amerika muri wa mugambi cyangwa insanganyamatsiko bise “Ubuzima bw’Abirabura ni nkenerwa (Black Lives Matter).
Iyi myigaragambyo y’abagore, umuhanda barimo wari wafunzwe (ku modoka) mbere y’uko itangira. Igice kimwe cy’abari bayirimo cyarerekanwe ku mbuga nkoranyambaga n’inyandiko cyangwa Pankarite zanditseho ngo “Black Femme March takes I-5”.
Videwo yazengurutse ku rubuga rwa Twitter yerekana imodoka y’umweru yiruka n’umuvuduko mwinshi cyane, ikwepa izindi modoka ebyiri bari bafungishije uwo muhanda, nyuma ihita igonga abo bantu babiri barimo uwaje gupfa undi agakomereka cyane.
BBC dukesha iyi nkuru itangaza ko Umushoferi w’iyo modoka, Dawit Kelete aba Seattle yatawe muri yombi, akaba ashinjwa ibyaha bibiri byo gutera abantu akoresheje imodoka. Hagati aho, igipolisi nticyavuze niba uwakoze aya mahano yabigize nkana.
Munyaneza Theogene / intyoza.com
