Kuri uyu wa mbere tariki 06 Nyakanga 2020, bwa mbere mu Burundi hafashwe ibipimo 640 ari nabyo byinshi bya Covid-19 bifashwe ku munsi umwe kuva iki cyorezo cyahagera tariki 31 Werurwe 2020. Kuva Ndayishimiye Evariste arahiriye kuyobora u Burundi, yazanye impunduka mu gukumira no kurwanya iki cyorezo, bitandukanye no ku ngoma ya Nkurunziza wanenzwe kenshi guhisha iby’iki cyorezo.
Ibi bikorwa byo gupima abantu benshi byakozwe kuri uyu wa Mbere, biri mu bigize ubukangurambaga bushya bwo gupima abantu benshi bwatangijwe na minisiteri y’ubuzima mu Burundi bugamije kurwanya iki cyorezo cya Coronavirus.
Ubutegetsi bwa Perezida Pierre Nkurunziza wapfuye mu kwezi gushize kwa Kamena, bwanenzwe kenshi gufata nk’icyoroshye cyangwa gukerensa iki cyorezo kimaze kwica abantu barenga 540,000 ku isi.
Ubwo yarahizaga leta nshya tariki 30 Kamena 2020, Perezida mushya Evariste Ndayishimiye yagize ati: “Guhera ejo, njyewe ndiyemeje ko icyorezo cyandura cya corona ari umwanzi rutura w’Abarundi kuko ndabona ko bose imitima iri mu mutwe kubera icyo cyorezo, turiyemeje rero kurwanya uwo mwanzi. Ubu nyine dutangije isekeza (ubukangurambaga) ryo kurwanya icyo kiza mu Burundi twise “Ndakira, sinandura kandi sinanduza“.
Perezida Ndayishimiye, ubwo yarimo atanga amashimwe, mu birori by’umunsi w’ubwigenge, yagaragaje ibitari bimenyerewe ko adashyigikiye kwegerana no kuramukanya kw’abantu bahana intoki mu rwego rwo kwirinda iki cyorezo.
Ibikorwa by’ubu bukangurambaga byatangijwe kuri uyu wa mbere i Bujumbura, ahagaragaye abantu benshi bambaye udupfukamunwa, ibintu nabyo bitari bimenyerewe mu Burundi.
Pierre Nkurunziza wari Perezida w’u Burundi yanenzwe kenshi ko yafashe nk’icyoroshye/yakerensaga iki cyorezo ndetse akabigaragaza mu mbwirwaruhame ze zitandukanye.
Ku butegetsi bwe, ibikorwa byo kurwanya coronavirus ntibyashyizwemo imbaraga nyinshi, nko mu gupima; kuva iyi ndwara yahagera kugeza tariki 15/06 hafashwe ibipimo birenga gato 1,200.
Kuva hagiyeho Perezida mushya tariki 18 Kamena 2020, hamaze gufatwa ibipimo birenga gato 1,900. Mu kwezi kwa gatanu, umubano wa OMS-Burundi na leta wabayemo ikibazo nyuma y’uko uyihagarariye yirukanywe mu gihugu ku mpamvu zitatangajwe.
Gusa ubu imikoranire iri guhinduka, mu mpera y’icyumweru gishize, OMS ishami ry’i Burundi, yatanze inkunga y’ibikoresho bizifashishwa mu gusuzuma Covid-19 muri ubu bukangurambaga.
Minisiteri y’ubuzima mu Burundi ivuga ko ibikorwa byo gupima abantu ku bwinshi bigiye gukomeza mu rwego rwo kumenya neza uko iki cyorezo gihagaze mu Burundi. Mu kwezi gushize, bamwe mu Barundi babwiye BBC dukesha iyi nkuru ko batizeye ukuri kw’imibare itangwa na leta y’uko iki cyorezo gihagaze mu gihugu.
Mu ntangiriro y’ukwezi gushize kandi, ishyirahamwe ryigenga mu Burundi OLUCOME ryagaragaje impungenge rifite ku mibare itangazwa na leta y’uko iki cyorezo gihagaze. Leta nshya mu Burundi, biciye mu byavuzwe na Perezida mushya Ndayishimiye, irerekana impinduka n’imbaraga nshya mu guhangana n’icyorezo Covid-19.
Kugeza ubu mu Burundi leta imaze gutangaza ko abantu 191 banduye iyi ndwara, umwe niwe wahitanwe nayo mu gihe abantu 118 mubayirwaye bayikize. Hamaze gufatwa ibipimo byose hamwe birenga gato 3,200.
Munyaneza Theogene / intyoza.com
