Amerika yujuje umubare wa Miliyoni eshatu z’abanduye Coronavirus

Kuri uyu wa Gatatu tariki 08 Nyakanga 2020, nibwo Leta zunze Ubumwe za Amerika zujuje umubare w’abamaze kwanduka icyorezo cya Coronavirus Miliyoni eshatu. Nicyo gihugu kiza ku mwanya wa mbere ku isi mu kugira umubare munini w’abanduye iki cyorezo.

Kuzuza umubare wa Miliyoni eshatu z’abamaze kwandura iki cyorezo, bije bihurirana n’uko kuri uyu wa Kabiri tariki 07 Nyakanga 2020 Perezida Donald Trump yateye intambwe ikomeye yo gukura iki gihugu mu ishami ry’umuryango w’Abibumbye ryita ku buzima OMS/WHO, akabikora mu nyandiko.

Amerika iza ku mwanya wa mbere mu bihugu bifite abantu benshi banduye iki cyorezo, ikagira kandi abarenga ibihumbi 131 bahitanwe n’iki cyorezo.

Perezida Trump, kuri uyu wa gatatu yahamagariye abanyeshuri kuzasubira mu masomo nyuma y’ikiruhuko cyo muki. Ibi yabisabye mu gihe za leta zo mu majyepfo y’iki gihugu zikibangamiwe bikomeye na COVID-19, aho usanga zifite imibare ikiri hejuru kandi igenda yiyongera.

Icyorezo cya COVID-19, nkuko ijwi rya Amerika dukesha iyi nkuru ribitangaza, kimaze kwandura abantu bashyka muri Miliyoni 12 ku Isi yose, mu gihe abasaga 500 kimaze kubahitana kuva ku muntu wa mbere cyagaragayeho mu gihugu cy’u Bushinwa mu mpera z’umwaka ushize wa 2019.

Bimwe mu bisabwa buri wese mu rwego rwo gukumira no kwirinda iki cyorezo cya Coronavirus, birimo kugira isuku ukaraba amazi meza n’isabune, Gukoresha umuti usukura intoki- Hand Sanitizer, Kwambara Agapfukamunwa hamwe no gusiga intera nibura ya Metero hagati y’umuntu n’undi.

Munyaneza Theogene / intyoza.com

Umwanditsi

Learn More →