Leta zunze ubumwe z’Amerika zafatiye ibihano abategetsi b’Ubushinwa. Barashinjwa kuba barakoze ibyaha bihungabanya uburenganzira bwa muntu ku bwoko bw’inkehwa z’abayisilamu bo mu bwoko bw’aba-Uighur.
Abategetsi bafatiwe ibyo bihano barimo; Chen Quanguo, umunyamabanga w’ishyaka ry’abakomunisiti mu ntara ya Xinjiang hamwe n’abagize ibiro by’umutekano muri iyo ntara. Ni ibihano bifashwe mu gihe Amerika n’Ubushinwa bitarebana neza kuva aho Ubushinwa bushinjijwe ko bwitwaye nabi mu gihe icyorezo cya COVID-19 cyadutse gikomotse mu mujyi wa Wuhan ho muri iki gihugu.
Ambasade y’Ubushinwa i Washington nkuko ijwi rya Amerika ryabitangaje, yahisemo kuruca irarumira kuri ibi bihano byafashwe na Amerika. Ariko mu gihe cyashize, Ubushinwa bwakomeje guhakana kugira uruhara mu gutoteza no guhohotera ubwo bwoko bw’inkehwa.
Ibyo bihano Amerika yafashe, bifata ubutunzi abo bategetsi b’Ubushinwa bafite muri Amerika kandi bibuza abanyamerika gukorana ubucuruzi n’abo bategetsi.
Imibanire n’imigenderanire ya Amerika n’Ubushinwa imaze iminsi itifashe neza. Nta gihe kinini gishize ibihugu byombi bifashe ingingo zisa n’izibasira kuri buri ruhande ibitangazamakuru by’ikindi gihugu ku butaka bwacyo, aho usanga bibishinja gukorana bya hafi cyangwa se mu nyungu z’ubutegetsi bw’ibihugu byabo. Abahanga muri Politiki n’abasesenguzi, bavuga ko mu myaka isaga 40 ishize nta mu bano mwiza waranzwe hagati ya Amerika n’Ubushinwa.
Munyaneza Theogene / intyoza.com
