Umusenateri wo muri Kenya, mu mpera z’icyumweru gishize yafatiwe mukabari yarenze ku mabwiriza y’umukwabu washyizweho na Leta mu rwego rwo gukumira ikwirakwizwa rya Coronavirus. Nyuma yo gufatwa, yasabye imbabazi Abanyakenya, ariko ntabwo byabujije ko afungwa by’igihe gito, aho yavuyemo atanze ingwate. Biteganijwe ko kuri uyu wa Kabiri agezwa imbere y’ubutabera kwisobanura.
Ni Senateri Johnson Sakaja uhagarariye akarere k’umurwa mukuru Nairobi, aho mu mpera y’icyumweru gishize yasanzwe ari mukabari mu murwa mukuru I Nairobi anywa inzoga. Yafashwe hashize amasaha make umukwabu wa saa tatu z’ijoro utangiye.
Amabwwiriza yashyizweho mu kwirinda ikwirakwizwa ry’icyorezo cya Coronavirus, avuga ko nta muntu uba wemerewe kuba ahatari iwe guhera saa tatu z’ijoro kugeza saa kumi za mu gitondo.
Senateri Sakaja yafungiwe by’akanya gato ku biro bya Polisi byo mu mujyi wa Nairobi, mbere yuko afungurwa amaze gutanga amafaranga y’ingwate. Biteganijwe ko kuri uyu wa kabiri tariki 21 Nyakanga 2020 agezwa mu rukiko, ariko avuga ko yiteguye kwirengera ibikorwa bye.
Hagati aho, Senateri Sakaja yavanywe ku buyobozi bw’akanama gakomeye ko mu nteko kagenzuraga uko Kenya iri kwitwara mu kurwanya Covid-19. Videwo iri guhererekanywa ku mbuga nkoranyambaga, yagaragaye ejo ku cyumweru, yerekana Senateri Sakaja w’imyaka 35 y’amavuko ari muri kasho ya polisi aterana amagambo n’abapolisi nyuma yo gutabwa muri yombi.
Abanya-Kenya, BBC dukesha iyi nkuru itangaza ko bamaze igihe binubira ko amategeko n’amabwiriza akaze yo kurwanya coronavirus ashyirwa mu bikorwa mu buryo butandukanye bitewe n’uwo uri we. Binubira ko abanyapolitiki bayarengaho ku mugaragaro bagakoresha za mitingi zitabirwa n’imbaga kandi izo mitingi zaraciwe.
Polisi ya Kenya na yo yanenzwe gukubita, gukomeretsa no kwica Abanya-Kenya mu gihe cy’iyubahirizwa ry’ayo mategeko.
Zimwe mu ngamba zikaze zibuza guterana mu nsengero no kubuza ingendo mu duce tw’ingenzi tw’izingiro rya coronavirus, kuri ubu zakuweho, nubwo coronavirus ikomeje kwiyongera mu gihugu. Kugeza ubu muri Kenya abanduye coronavirus bageze ku 13,353, muri bo 234 imaze kubica.
Munyaneza Theogene / intyoza.com
