Igisirikare cya Leta zunze ubumwe za Amerika ku mugabane wa Afurika, AFRICOM, cyavuze ko kuri uyu wa 22 Nyakanga 2020 kishe abarwanyi barindwi bafitanye isano n’umutwe ufatwa nk’uw’iterabwoba wa Leta ya kiyisilamu mu gitero cy’indege cyakoze mu ntara ya Puntland ya Somaliya.

AFRICOM yatangaje ko iki gitero bagikoze bihimura ku gitero abo barwanyi bakoze ku ngabo za Somaliya. Yavuze kandi ko nta musivile wakomeretse cyangwa se wapfuye muri icyo gitero.
Kugeza ubu, mu gihe kigera ku mwaka, Amerika imaze kugaba ibitero by’indege 42 ku bakora iterabwoba muri Somaliya.

Abategetsi b’iyo ntara nabo nkuko ijwi rya Amerika ribitangaza, bavuze ko bishe abarwanyi 20 b’umutwe w’iterabwoba wa Leta ya kiyisilamu mu kindi gitero cyagabwe mu ntara ya Bari. Bemeza ko abategetsi babiri bakomeye b’abo barwanyi bahasize ubuzima.

Munyaneza Theogene / intyoza.com