Leta ya Uganda yatangaje umuntu wa mbere wahitanwe na Covid-19

Minisitiri w’Ubuzima wa Uganda kuri uyu wa 23 Nyakanga 2020, yemeje ko hari umuntu umwe wapfuye ahitanwe n’icyorezo cya Covid-19. Uwahitanwe n’iki cyorezo ni umugore w’imyaka 39 y’amavuko wo mukarere ka Namasindwa hafi y’umupaka w’iki gihugu na Kenya. Uyu wapfuye yari umufasha w’abaganga, yari amaze mubitaro iminsi munani.

Nubwo uyu mugore wapfuye atuye ku mupaka uhuza iki gihugu na Kenya, abashinzwe ubuzima batangaje ko ntakerekana ko yaba yaragiye muri Kenya, igihugu kibasiwe n’iki cyorezo kikanagira abanduye benshi kurusha Uganda.

Uwo mugore wapfuye, yari umufasha w’abaganga ku bitaro, akaba yagejejwe kwa muganga itariki 15 z’uku kwezi kwa karindwi 2020 arembejwe n’umusonga, ahitanwa n’iki cyorezo hashize iminsi umunani.

Minisiteri y’Ubuzima muri Uganda ivuga ko abantu mirongo itatu bashobora kuba baregeranye n’uwo mugore bashyizwe mu kato, bakaba bakirimo gushakisha abandi baba barahuye nawe.

Nkuko BBC ibitangaza, Uganda yatangiye intambwe zo gukuraho cyangwa se koroshya amategeko ya “guma murugo”, aho mu kwezi kwa gatanu abadandaza mu bice bitandukanye kandi bituwe cyane muri Kampala bemerewe  guzubukura ibikorwa byabo. Kugeza ubu, Uganda imaze gutangaza abantu 1,079 banduye Covid-19.

Munyaneza Theogene/ intyoza.com

Umwanditsi

Learn More →