Tanzania yabujije indege za kompanyi itwara abantu ya Kenya, “Kenya Airways”, kwinjira mu gihugu, ibi yabikoze nyuma y’aho iki gihugu nacyo kimiye uburenganzira indege za Tanzania bwo kwinjira ku butaka bwacyo.
Ejo ku wa gatanu tariki 31 Nyakanga 2020, Minisitiri w’ubuzima wa Kenya, Mutahi Kagwe, yatangaje ingingo ngenderwako zijanye no gusubira kwemerera indege mpuzamahanga kwinjira mu gihugu.
Mu byari muri izo ngingo, harimo urutonde rw’ibihugu abanyagihugu babyo bemerewe kwinjira muri Kenya. Ariko rero, kuri urwo rutonde, abo mu gihugu gituranyi cya Tanzania ntibarimo.
Minisitiri Kagwe ati: “Izi ngingo zishingiye ku ngaruka zishobora kugaragara, ntizishingiye ku bijyanye n’imigenderanire”. Hagati aho, ingingo yo kubuza indege za Kenya Airways yerekana ko hari ibibazo hagati y’ibi bihugu byombi.
Indege zemerewe kwinjira muri Kenya ni izo mu bihugu by’u Bushinwa, Korea y’Epfo, u Buyapani, Canada, Zimbabwe, Ethiopia, Ubuswisi, Uganda, Rwanda, Namibia na Maroke. Icyorezo cy’indwara ya coronavirus nicyo kibazo kindi giteye ukutumvikana mu by’imigenderanire hagati y’ibi bihugu.
Mu kwa gatanu k’uyu mwaka wa 2020, Kenya yafunze mipaka iyihuza na Tanzania nyuma y’aho bigaragariye ko hari imibare myinshi y’abashoferi b’amakamyo bapimwe bava Tanzania bageze ku mupaka bagasanga baranduye coronavirus.
Haciye iminsi mike, umukuru w’igihugu cya Tanzania John Pombe Magufuli yamenyesheje ko yavuganye na mugenziwe wa Kenya Uhuru Kenyatta, kandi ko bari bumvikanye ko abaminisitiri bo muri ibyo bihugu byombi bari kubonana kugira ngo bashakire umuti icyo kibazo.
Bamaze kubonana, nkuko BBC ibitangaza, bumvikanye gusa ku bijyanye no gupima no kwemeza ko abashoferi bapimwe bagasanga ntibanduye Covid-19 bashobora bemererwa kwinjira mu gihugu, ariko imipaka hagati y’ibyo bihugu yagumye ifunze.
Ibi bibaye byerekana ko uku kutumvikana hagati ya Tanzania na Kenya gushobora kwiyongera, bitandukanye n’uko aba bategetsi bombi bari bijeje abanyagihugu mu kwa gatanu uyu mwaka.
Hari kandi n’abagifite impungenge, babona ko Tanzaniya yafashe mu buryo bworoheje ikibazo ca Coronavirus, ko kandi icyizere cyo kugarukana ubwumvikane hagati y’ibi bihugu byombi bigaragara ko kikiri gike.
Munyaneza Theogene / intyoza.com
