Constantino Chiwenga, usanzwe ari Visi Perezida wa Zimbabwe yagizwe na Minisitiri w’ubuzima. Hashize hafi ukwezi iyi minisiteri yugarijwe n’ibivugwa ko ari ibibazo by’uburiganya n’ubujura mu kugura ibikoresho byo kurwanya icyorezo cya coronavirus.
Bwana Chiwenga wahoze ari Jenerali, akaba n’umukuru w’ingabo z’iki gihugu, yanayoboye ibikorwa bya gisirikare byo guhirika ku butegetsi Robert Mugabe wahoze ari Perezida w’iki gihugu.
Obadiah Moyo, wabanjirije Chiwenga muri iyo minisiteri y’ubuzima, yagejejwe mu rukiko mu kwezi kwa gatandatu 2020 ashinjwa ibirego bya ruswa bijyanye na kontaro ya miliyoni 20 z’amadolari yahawe kompanyi yo muri Hongrie. Bivugwa ko iyo kontaro yatanzwe bitanyuze mu nzira ziboneye. Yabaye afunguwe by’agateganyo.
Itangazo ry’ejo ku wa kabiri tariki 04 Kanama 2020 ryasohowe n’ibiro bya perezida rigira riti: “Perezida Mnangagwa yabonye ukuntu bicyenewe, byihutirwa ko ibijyanye no kwita ku buzima bishyirwa ku murongo mu rwego rw’icyorezo cya Covid-19 aho igihugu cyagize ukwiyongera bikomeye kw’imibare”.
Kugeza ubu muri Zimbabwe nkuko BBC ibitangaza, habarurwa abanduye coronavirus bagera ku 4221, muri bo 81 yarabishe nkuko imibare ya Kaminuza ya Johns Hopkins yo muri Amerika ibigaragaza.
Nubwo iyi mibare igaragazwa itya, harashidikanywa ku kuri kwayo, aho bivugwa ko umubare nyakuri ushobora kuba urenga kubera ubushobozi bucye bwo gupima, kimwe no mu bindi bihugu bimwe na bimwe ku isi bifite imibare ishidikanywaho.
Munyaneza Theogene / intyoza.com
