Willian, umukinnyi wari umaze imyaka 7 akinira ikipe ya Chelsea yo mu cyiciro cya mbere mu bwongereza akaba akomoka muri Brazil, kuri uyu wa 09 Kanama 2020 yemeje ko avuye muri iyi kipe nyuma y’imyaka irindwi ayikinira.

Willian w’imyaka 32, ntabwo yakinnye umukino wa Champions League w’ejo ku wa gatandatu iyi kipe ya Chelsea yakinnyemo na Bayern yo mu gihugu cy’Ubudage kubera imvune afite.

Mu cyumweru gishize, BBC Sport yatangaje inkuru yuko Arsenal iri hafi kwemeranya amasezerano n’uyu Munya-Brazil unakina nk’umukinnyi wo hagati usatira izamu.
Mu ibaruwa ifunguye yandikiye abafana ba Chelsea, Willian yagize ati: “Igihe ubu kirageze ngo ngende”.

“Ngiye nemye, ntekanye nzi ko hari ibintu natsindiye hano kandi iteka nitanze uko nshoboye nambaye umwenda wa Chelsea”. Ayivuyemo ayikiniye imikino 339.

Willian, nkuko BBC ibitangaza, yageze muri Chelsea muri 2013 avuye mu ikipe ya Anzhi Makhachkala yo mu Burusiya aguzwe miliyoni 30 z’amapawundi.

Ari kumwe na Chelsea, yatsindiye ibikombe birimo bibiri bya shampiyona ya Premier League na kimwe cya Europa League.
Willian yongeyeho ati: “Habayeho ibihe byinshi cyane by’ibyishimo, bimwe by’akababaro, habayeho kwegukana ibikombe, kandi iteka byakoraga ku mutima cyane”.

Munyaneza Theogene / intyoza.com