Kenya: Gahunda ya “Guma mu rugo” yatumye hazavuka abana benshi

Abategetsi ba Kenya biteze ko mu mpera z’uyu mwaka wa 2020 haba imibare y’umurengera y’abana bazavuka, nk’uko bivugwa n’ikinyamakuru Standard cyo muri iki gihugu, gisubiramo ibitangazwa na minisiteri y’ubuzima ku ngaruka za coronavirus.

Imibare iva mu gihugu cyose yerekana ko abajya gupimisha inda kwa muganga imibare yiyongereye ku rugero rw’ 10% kuva mu kwa gatatu uyu mwaka, ugereranije n’imyaka ibiri ishize, nk’uko icyo kinyamakuru gikomeza kibivuga.

Nta bisobanuro bitangwa kuri uko kwiyongera, ariko umuhanga mu by’ubuvuzi asubirwamwo amagambo avuga ko amavuriro yitaye kuri iki cyorezo akibagirwa gutanga uburyo bwo kwirinda gusama inda.

Umuhanga mu bijyanye n’imyororokere n’ubuzima bwiza, Victor Rasugu, yabwiye ikinyamakuru The Standard ko mu mpera z’uyu mwaka hitezwe kuvuka abana benshi basamwe inda mu gihe cya coronavirus.

Rasugu ati: “Nta kibuza, hazavuka abana benshi cyane kubera ubukene bw’uburyo bwo kwirinda gusama inda”.

Bwana Rasugu, uyoboye ishyirahamwe ry’urubyiruko, Network For Adolescent and Youth of Africa, avuga ko uko kwiyongera kw’abana bavuka hamwe n’abakuramo inda bizakomeza kugera mu ntangiriro z’umwaka utaha.

Iki cyegeranyo cya minisiteri y’ubuzima cyerekana ko kugeza mu kwa gatandatu uyu mwaka wa 2020, abana basamye inda bangana na 174.203.

Kuva mu kwa gatatu konyine, abana 112.456 batewe inda, aho mu kwa gatandatu konyine abagera ku 30.418 aribo bagiye kwipimisha inda kwa muganga.

Leta ya Kenya nkuko BBC ibitangaza, yafashe ingamba zo kubuza urujya n’uruza mu masaha y’ijoro kuva mu kwa gatatu, hamaze kuboneka umuntu wa mbere wanduye iki cyorezo, inihanangiriza abakoresha ko bakwemerera abakozi babo gukorera mu rugo.

Urujya n’uruza ku murwa mukuru Nairobi no muyindi mijyi 2 iri ku nkengero y’inyanja rwarahagaritswe mu gihe kitari gito. Ibarura ryo mu mwaka wa 2019 ryerekana ko Kenya ifite abantu miliyoni 47 n’igice.

Munyaneza Theogene / intyoza.com

Umwanditsi

Learn More →